«Туды қорлаған қыздарға қылмыстық іс қозғауға негіз жоқ» – Абзал Құспан
Мәжіліс депутаты, заңгер Абзал Құспан мемлекеттік туды қорлаған қыздарға неге қылмыстық іс қозғалмағанын түсіндірді. Депутаттың айтуынша, бұл оқиғаға қатысты бастапқыда қылмыстық іс қозғалғанымен, кейін толық тергеу нәтижесінде қылмыстың құрамы дәлелденбеген.
«Қылмыстың төрт құрамдас бөлігі болады. Ең бастысы — адамның ниеті, яғни бұл әрекетті әдейі, қасақана жасағаны дәлелденуі тиіс. Егер адам қасақана, терең ойластырылған түрде әрекет етсе ғана қылмыс ретінде қарастырылады. Бұл жағдайға қатысты тергеу барысында олардың қылмыс жасау ниеті болмағаны анықталған», – деді заңгер.
Абзал Құспанның айтуынша, әлеуметтік желіде тараған фотодағы туды қыздар өздері жасамаған. Атап айтқанда, қыздар туды маркетплейстен алған.
«Бұл істе бастапқыда қылмыстық іс қозғалды, бірақ тергеу нәтижесінде қылмыстық құрам болмағаны анықталды. Туды басқа жерде Қытайда шығарған болу керек», – дейді Құспан.
Заңгер бұл жағдайдан қоғам сабақ алуы қажет екенін айтады.
«Бұл іс — үлкен сабақ болуы керек. Қоғамда да, ақпарат құралдарында да мұндай әрекеттерді асыра сілтемей, байыппен қарау қажет. Көптеген адам жалған ақпараттың жетегінде кеткен», – деді ол.
Абзал Құспанның айтуынша, қылмыстық іс қозғалмауы – дәлелдің жеткіліксіздігі мен ниеттің болмауына байланысты. Бұл жағдай қоғам үшін сабақ болып, болашақта мұндай әрекеттерге жол берілмеуі тиіс.
Еске сала кетейік, Атырау соты арабша жазуы бар, Қазақстанның туымен түскен қыздарға әкімшілік жаза тағайындап айыппұл салды.
Ал Мәдениет министрлігі ІІМ-ге хат жазып, арабша жазу басылған көк байрақты сатқан маркетплейстерді жазалауды сұрады.
