Цифрлық даму министрі Жаслан Мәдиев VPN қолданбауға кеңес берді
ҚР Цифрлық даму, инновациялар және аэроғарыш өнеркәсібі министрі Жаслан Мәдиев қазақстандықтарға TikTok желісіне қолжетімділікте қиындықтар туындаған жағдайда VPN қолданбауға кеңес берді. .
«VPN мәселені күрделендіреді»
«VPN қолданылған кезде, керісінше, қосымшаның жұмысы күрделене түседі. Себебі IP-адрестің ауысуына байланысты қазақтілді және орыстілді контенттің модераторлары заңға сәйкес келмейтін, яғни модерациядан өтуі тиіс трафикті жылдам анықтай алмай қалады», – деді министр.
Мәдиевтің айтуынша, егер TikTok желісінде қандай да бір ақаулар болса, қазақстандық тарап платформа өкілдерімен тікелей байланысқа шығып, келіссөздер жүргізеді.
«Трафикті реттеу мәселесі – Мәдениет және ақпарат министрлігінің құзырындағы дүние. Ал интернеттің жұмысында қандай да бір ақаулар байқалып жатқан жоқ, сондықтан оның TikTok қызметіне кері әсері туралы айтуға негіз жоқ», – деді ол.
Министр Жаслан Мәдиев TikTok желісіндегі қиындықтар туындаған жағдайда VPN қолдану мәселені шешпейді, керісінше, одан сайын күрделендіруі мүмкін екенін ескертті. Сонымен қатар, TikTok-тың Қазақстандағы қызметі бойынша жауапкершілік тікелей Мәдениет және ақпарат министрлігіне тиесілі екенін атап өтті.
Еске сала кетейік, бұған дейін АҚШ президенті Қытайдың талабына келіспеген жағдайда Америкада TikTok бұғатталуы мүмкіндігі туралы жазған едік.
