Жаңа eGov іске қосылады. Оның ескі платформадан ерекшелігі қандай
Цифрлық Даму, инновациялар және аэроғарыш өнеркәсібі министрлігі алдағы уақытта жаңа eGov платформасын іске қосады. Енді платформа AI ассистент көмегімен жұмыс істемек. Ескі eGov пен жаңа eGov-тың айырмашылығы жөнінде Мәжіліс кулуарында Цифрлық Даму, инновациялар және аэроғарыш өнеркәсібі министрі Жаслан Мәдиев айтты.
«Жаңа eGov платформасы заманауи технологиялар негізінде, жаңа архитектуралық шешімдер арқылы әзірленеді. AI функциялары іске қосылады. Қазір оны тестілеуден өткізіп жатырмыз. Портал визуалды түрде жаңартылады. Мүгедектігі бар адамдар үшін портал ыңғайлы болады», – деді министр.
Десе де, бұл платформаның мінсіз жұмыс істейтініне Мәдиев еш кепілдік бере алмады. Айтуынша, мұндайды ешкім болжай алмайды. Өйткені портал болған соң, техникалық ақаулар болуы орынды. Министрлік жаңа порталды осы жылы іске қосуды жоспардап отыр.
Айта кетсек, кеше, сәуірде Жаслан Мәдиев премьер-министр Олжас Бектеновке баяндама жасап, цифрлық дамуға қатысты жоспарымен бөліскен болатын. Сонда министр eGov порталы 2013 жылғы шектеулі технология негізінде жұмыс істеп келе жатқанын айтып, порталдың жаңғыртылатынын айтқан болатын.
