Депутат Жанарбек Әшімжан ЛГБТ насихатына тосқауыл қоюды талап етті
Мәжілісте тағы да ЛГБТ мәселесі көтерілді. Екі бірдей депутат Үкіметке ЛГБТ ұйымдардың жұмысын тексеріп, мұндай «азғындықты» насихаттауға заңмен тыйым салуды ұсынып, сауал жолдады.
TikTok-тағы белсенділік
Депутат Жанарбек Әшімжан соңғы жылдары ЛГБТ-ны насихаттайтын ұйымдардың белсенділік танытып жатқанын, әсіресе, TikTok сынды әлеуметтік желіде аталмыш мәселеге қатысты үгіттеу видеолары көбейіп кеткенін айтады.
«Олар TikTok, өзге де платформалар арқылы өскелең ұрпақты азғындыққа үгіттеуде. Аса жоғары технологиялық әдіс-айламен қаруланған мұндай қитұрқы үгіт-насихатқа әлі кәмелеттік жасқа толмаған, жақсы мен жаманды айыра білмейтін, бұғанасы бекімеген, рухани діңгегі қатпаған балалар мен жасөспірімдеріміз тез бой алдыратыны анық. Бұл әрекет БҰҰ-ның Балалар құқығы жөніндегі конвенциясына да қайшы келеді», – деді депутат.
«Феминита» туралы
Жанарбек Әшімжан мұндай ұйымдардың қоғамды іштен ірітіп, мемлекетке қауіп төндіретінін атап өтті. Депутат «Феминита» ұйымының мектеп оқушыларының чатына хабарлама жібергенін, онда «жыныстық қатынасқа баулитын, қалай гомосексуалист, лесбиянка болу жолдарын үйрететін іс-шараға» шақырту жіберілгенін айтып, өскелең ұрпақты аталмыш ұйымдардың насихатынан қорғау маңыздылығына тоқталды.
«ЛГБТ насихатына заңмен тыйым салуға да бастамашылдық еттік. Алайда бұл Үкімет тарапынан қолдау таппай келеді. Енді Үкімет халықаралық үкіметтік емес қорлар мен ұйымдардың қас-қабағына қарап жалтақтамай, еліміздің ішкі ісіне араласып, шаңырағымызды шайқағысы келетін мұндай қадамдарға батыл тосқауыл қоймаса бәрі де кеш болады», – деп ескертті депутат.
Бұл мақсатта депутат әлеуметтік желілерді қатаң сүзгіден өткізіп мұндай сарындағы ақпаратқа тосқауыл қоюды, ЛГБТ қозғалысының кәмелеттік жасқа толмағандарға әсері туралы зерттеу жүргізуді, сырттан қаржыландырылатын, түрлі гранттар алатын, ұлттық салт-дәстүрімізді мансұқ ететін үкіметтік емес ұйымдарды тексеруді ұсынды.
150 млн доллар
Өз сауалында депутат Еділ Жаңбыршин әріптесінің бастамасын қолдады. Депутат әсірефеминистік, ЛГБТ, эмо және басқа да субъмәдениеттік қозғалыстар арнайы, жоспарлы түрде миллиондаған АҚШ долларымен қаржыландырылып келгенін, олардың ұлтараздық пен діни алауыздықты, сепаратизм мен трайбализмді біздің саяси күн тәртібімізге енгізуге күш салғанын айтты.
Депутаттың айтуынша, соңғы он жылдықта Қазақстанның ішкі саясатына ықпал ету үшін USAID-тен 150 млн доллардан астам қаражат бөлініпті.
«Осындай ұйымдар демократиялық қағидаттарды желеу етіп, жалаң ұранмен «жұмсақ күш» арқылы өзінің жымысқы саясатын іске асырады. Оларға Қазақстанның жақсарғаны емес, шайқалғаны пайдалы», – дейді депутат.
Жаңбыршин сыртқы күштердің ел саясатына араласуына жол бермеу үшін АҚШ, Қытай, Ресей сияқты арнайы заңдар қабылдау мәселесін көтерді.
Депутат Қаржы министрлігі мен тиісті мемлекеттік органдарға мынадай ұсыныс білдірді:
- Еліміздің ішкі саясатына араласуға бағытталған сырттан құйылған қаржыны анықтап, тиісті шара қабылдасын;
- Шетелден қаржыландырылатын ұйымдардың қызметін реттейтін қолданыстағы заңнаманың тиімділігіне талдау жүргізсін;
- Шетелдік гранттар арқылы қаржыландырылатын жобалар мен ұйымдардың қызметін бақылау және реттеу механизмдерін жетілдіру қажет.
