Рейдерлік жасағаны үшін Нығматулиннің ұлының үстінен қылмыстық іс қозғалды

Мәжілістің экс-төрағасы Нұрлан Нығматулиннің үлкен ұлы Нұржан Нұрлановтың үстінен қылмыстық іс қозғалды. Бұл туралы Ішкі істер министрлігіне сілтеме жасап, КазТАГ басылымы хабарлады.
«Сұрауда көрсетілген факті бойынша Алматы қалалық Полициz департаментінің Тергеу басқармасы ҚР Қылмыстық кодексінің 389-бабы (озбырлық) бойынша сотқа дейінгі тергеп-тексеру амалдарын жүргізіп жатыр. Қазіргі уақытта істің мән-жайын жан-жақты, толық және объективті тексеру мақсатында жедел-іздестіру іс-шаралары жүргізілуде», – деп хабарлаған басылымға Ішкі істер министрлігі.
Рейдерлік
Ал істің қозғалуына кәсіпкер Қанат Әміркиннің арызы себеп болған. Бизнесмен шенеуніктің ұлы «Алатаудорстрой» компаниясын тартып алып, қоқан-лоққы көрсетіп, қомақты ақша талап еткенін мәлімдеген.
Кәсіпкер қылмыстық істің әзірге озбырлық фактісі бойынша тергеліп жатқанын, бірақ алдағы уақытта рейдерлік бабына өзгеруі мүмкін екенін айтқан.
«Тергеу жалғасуда. Компанияны қайта тіркеу фактісіне қатысты, әзірге бап осындай. Бірақ алдағы уақыта іс рейдерлік басып алу бабына қайта квалификацияланады деп есептеймін. Сондай-ақ жер телімін заңсыз иеліктен шығаруға қатысты алаяқтық фактісі бойынша да іс қозғалуы мүмкін», – деп мәлімдеген кәсіпкер.
Нұржан Нұрланов туралы
Нұржан Нұрланов «Қанды Қаңтарға» дейін 2019-2022 жылдар аралығында «ҚазМұнайГаз-Аэро» ЖШС-ның директоры қызметін атқарған. Ал бұған дейін «Бәйтерек» ұлттық холдингінің мүшесі болған. Жалпы, әкесі билікте қызмет еткен кезеңдерде Нұржан Нұрланов квазимемлекеттік секторда лауазамды қызметтер атқарғанын көруге болады.
Айта кетейік, Нұржан Нұрлановтың қоқан-лоққысынан кейін бизнесінен айырылған кәсіпкер 2024 жылдың желтоқсанында мәлімдеме жасап, өзінің фейсбуктағы парақшасында барлық мән-жайды түсіндірген болатын. Кәсіпкер бизнесінен айырылып қана қоймай, Нығматулиннің ұлының қыспағымен қомақты сомаға кредит рәсімдегенін, оны тікелей Нұрлановқа аударғанын айтқан. Сонымен бірге осындай қиындықтарға байланысты елден кетуге мәжбүр болғанын атап өткен.
Бұған дейін Нығматулиндер әулетінің тағы бір мүшесіне қатысты іс қозғалды. Нұрлан Нығматулиннің ағасы Арғын Нығматулин бүгінгі күні халықаралық іздеуде. Ол «Сарыарқа» хоккей клубын қарызға батырды деп айыпталып отыр.