Далада қалдық! Ақтөбедегі Қазақ-орыс халықаралық университеті 350 студентті оқудан шығарған

Жарияланды
General News бөлімінің редакторы
Университеті 350 студентті оқудан шығарған
Қазақ-орыс халықаралық университеті 350 студентті / Фото: kriu.edu.kz

Ақтөбеде орналасқан Қазақ-орыс халықаралық университеті 350 студентті ескертусіз оқудан шығарып жіберген. Бұл туралы бұқаралық ақпарат құралдарына студенттердің ата-анасы хабарлаған.

Оқудан шығарылған студенттер мен олардың ата-аналары мұның себебін білу үшін бұқаралық ақпарат құралдарының өкілдерімен бірге оқу орнына барған. Оқу орны ешкімді аямаған. Бірінші курсқа енді қабылданған студенттер мен көктемде оқуын аяқтайтын студенттерді де оқудан шығарған.

Университет өкілдері бұл студенттердің біршамасы сабаққа келмегені, біршамасы оқу ақысын төлемегені үшін оқудан шығарылғанын айтқан.

Алайда 2 курс студенті Фируза Кениспаева сабаққа келгенін, бірақ өзінен басқа ешкімнің сабаққа қатыспағанын айтады. Жалғыз өзі сабаққа қатысқаны себепті, ұстаздары сабаққа қатысудан босатқанын айтады.

«Ақшасын уақтылы төлеймін. Өткен жылы 400 жүз мың төледім. Осы жылы 500 мың төледім. Мен бір сөзбен айтқанда, далада қалдым», – дейді студент.

Ата-аналар мен студенттер оқу орнын сотқа беретінін айтты.

Айта кетсек, Астана қаласындағы оқу орындарының бірінде оқитын студент өзін оқудан шығарып жіберген ЖОО-ны сотқа беріп, жеңіп шыққан болатын.

Сондай-ақ оқыңыз