Alibaba Group осы айда ЖИ моделінің жаңартылған нұсқасы – Qwen 3-ті ұсынбақшы. Бұл туралы дереккөздеріне сілтеме жасаған Вloomberg хабарлайды.
Alibaba жасанды интеллект бағытында белсенді жұмыс істеп жатыр. Бұған дейін компания Qwen 2.5-Max және Qwen 2.5-Omni-7B модельдерін таныстырған. Олар DeepSeek және GPT-4o баламаларынан асып түседі деп сипатталды. Сәуір айындағы жаңа шығарылым осы үрдістің жалғасы болып, өнімділікті арттыруды, жаңа функцияларды немесе кеңейтілген интеграция мүмкіндіктерін ұсынбақшы. Ал наурызда жаңартылған Quark ЖИ-ассистенті таныстырылған еді.
Bloomberg жазуынша, қытайлық технологиялық компаниялар қолжетімді ЖИ модельдерін жедел түрде нарыққа шығарып, OpenAI, Google және Microsoft-қа бәсекелес болуға ұмтылып жатыр.
Осы жылы ақпанда Alibaba Group Holding жасанды интеллектіні дамытуға 53 млрд доллар салмақшы екенін хабарлаған. Осылайша Alibaba ЖИ пайданатын компаниялар үшін негізгі көшбасшы болуға ұмтылып жатыр.
Ал наурызда адам эмоциясын оқи алатын ЖИ жасап шығарды. R1-Omni деп аталатын жаңа үлгі компьютердің көру қабілетін одан әрі арттыра түседі деп хабарлады компания.
Бұл шешім OpenAI мен Қытайдың DeepSeek компаниясынан өсіп келе жатқан бәсекелестікке байланысты қабылданды. DeepSeek жуырда қуатты ЖИ моделін салыстырмалы түрде төмен шығынмен жасағанын мәлімдеген.
