AltynGold PLC компаниясы биржадан 10 млн доллар тартпақшы

Лондонда тіркеліп, Қазақстанда жұмыс істейтін AltynGold PLC компаниясы Астанадағы халықаралық биржаға (AIX) облигацияларын шығарып, 10 миллион доллар тартпақшы. Бұл туралы AIX-те жариялаған хабарламасынан белгілі болды.

Бұл үш жылдық облигациялар 2034 жылға дейінгі облигациялық бағдарлама аясында шығарылады. Оған сәйкес компания 100 млн доллар тартуды көздеп отыр. Бұған дейін, 2024 жылы жазда, нарықтан 10 млн доллар қарыз алған.

Осы шығарылымның купондық мөлшерлемесі жылдық 9,75%-ды құрайды, купонды төлеу әр тоқсан сайын жоспарланған. Әр қағаздың номиналды құны – 100 доллар, барлығы 100 мың дана шығарылады.

Компанияға бұл қаражат нақты қандай мақсатта қажет екендігі белгісіз. Бірақ компания 2023 жылы жариялаған есепте Терең-Сай және Секисовское кен орындарының толық мүмкіндігін іске асыру үшін сыртқы көздерден қаржы тарту жайлы жазылған.

Британдық компанияның 65,6% акциясын AGold Mining Group PLC арқылы Асаубаевтар отбасы (отбасының басшысы Қанат және оның балалары Айдар мен Санжар – үшеуі де компанияның басқарма құрамында) басқарады. Ал 5,3% акциясы JSC Freedom Finance иесі Тимур Турловқа, 0,3% акциясы компанияның тәуелсіз директоры Ашар Курешиге тиесілі.

Компания 1997 жылы жұмысын бастаған, қазір ол Қазақстандағы Секисовское кен орнында алтын өндірумен айналысады және Терен-Сай кен орнындағы барлау және игеру құқықтарына ие. Компанияда өндірістік шахта, өңдеу зауыты, инфрақұрылым және үлкен активтер базасы бар. 2024 жылы AltynGold 38,7 мың унция алтын сату арқылы 94,5 миллион доллар рекордтық табыс тапты.