Ресей үшін Украинада соғысқан қазақстандықтардың тізімі шықты – ІІМ жауап берді
Украинада жалдамалы әскер ретінде соғысып жүрген қазақстандықтар туралы ақпаратты әлі тексеру керек, оның қаншалықты шын екендігі белгісіз. ІІМ осындай мәлімдеме жасады.
«Біз біріншіден ол цифралардың қаншалықты рас екенін білмейміз. Оны қарау, тексеру керек» , – деді ІІМ-нің орынбасары Игорь Лепеха журналистер сұрағына.
Украинаның тұтқынға берілгісі келетіндермен жұмыс істейтін «Хочу жить» жобасы Ресей әскерінің қатарында соғысып жүрген қазақстандықтар тізімін жариялады. Онда 661 адамның есімі бар, туған күндері, әскери жетон нөмірлері және қаза тапқандары туралы белгі көрсетілген. Жобаның дерегіне сүйенсек, бүгінде олардың 78-і қайтыс болған.
«Біздің қолымыздағы деректерге сүйенсек, 2024 жылдың соңына қарай 661 жалдамалының (Қазақстан) кемінде 78-і қаза тапқан. Бұл – тек өлімінің нақты күні мен жерленген орны белгілі болғандар. Ресей армиясының шығынын есептеп жүрген волонтерлер 2024 жылдың қазан айында Украинада қаза тапқан этникалық қазақтардың саны 3000-нан асқанын хабарлаған еді», – деп хабарлайды «Хочу жить» иелері. Жоба авторларының сөзінше, Украинада Қазақстаннан бөлек Өзбекстан, Тәжікстан және Қырғызстан тұрғындары да бар.
Орталық Азия азаматтарын Ресей армиясына жалдау үш негізгі әдіспен жүзеге асырылған көрінеді. Олар: алдау, жоғары жалақы уәде беру немесе қорқыту. Кейбіреулеріне белгілі бір кәсіпорынды күзететін жұмыс ұсынады, басқаларына ай сайынғы жоғары жалақы мен Ресей азаматтығын уәде етеді, ал үшіншілерін түрмеге жабамыз немесе депортациялаймыз деп қорқытады.
Еске салайық, жалдамалылық – Қазақстан Республикасының заңнамасына сәйкес қылмыстық жауапкершілікке тартылады. Өзге елдің армиясы қатарында соғысқа қатысқаны үшін 12 жылдан 17 жылға дейін бас бостандығынан айырып, мүлкі тәркіленеді.
Осыған дейін Ресей абақтысында жатқан 100-ге жуық қазақстандықты Украинада соғысқа қатысуға үгіттегені жайлы ақпарат тарады. Бірақ сыртқы істер министрлігі оны жоққа шығарды.
«Бұл әрі кетсе 10-нан аспайды. Бұл фактінің бәрін білеміз. Ол азаматтар жұмысты Telegram арналардан немесе әлеуметтік желіден тапқан. Олар қайда баратынын, не істейтінін білген. Туыстарымен (Ресейдегі) біздің консулдар байланысты. Бірнеше рет барып олармен кездесіп келді. РФ Сыртқы істер министрлігі, жергілікті билікпен байланыстамыз», – деді Айбек Смадияров.
