Сарапшылар сәуірде теңге курсының қалай өзгеретінін айтты
Сәуірде теңге бағамы 505-515 теңге аралығында болады. Halyk Finance сарапшылары ұлттық валюта курсына қатысты болжамын жариялады.
Наурыз қорытындысы бойынша теңге бағамы 1%-ға әлсіреп, 504,27 теңге деңгейіне жетті Бұған Ресей рублінің нығаюы айтарлықтай әсер етті дейді сарапшылар. Наурыз айында Қазақстан қор биржасындағы (KASE) жалпы сауда көлемі 4,1 млрд АҚШ долларын құрады. Бұл ақпандағы 4,7 млрд және қаңтардағы 4,5 млрд доллармен салыстырғанда төмен көрсеткіш.
Сәуір айындағы теңге бағамы бойынша болжам
Сәуірде Ұлттық Банктің валютаны таза сатылым көлемі айтарлықтай өзгермейді деп күтеді.
«Осыған байланысты біз доллардың теңгеге шаққандағы бағамы сәуір айының соңында 505-515 теңге аралығында болады деп болжаймыз. АҚШ пен Ресей арасындағы Украинадағы қақтығысты реттеу жөніндегі келіссөздердің баяу жүруі рубльдің әлсіреуіне әкеліп, теңгеге қосымша қысым жасайды», – деп жазылған Halyk Finance талдауында.
Ұлттық Банктің валюта нарығындағы операциялары
Наурызда Ұлттық Банктің биржадағы таза валюта сатылымы 998 млн долларды құрады (ақпанда – 1100 млн доллар). Алтын өндірушілерден сатып алынған алтынды сату нәтижесінде түскен долларды сатудан (айналы түрде сату) 249 млрд теңге түсті (шамамен 500 млн доллар).
Сәуірде Ұлттық қордан сатылатын валютаның көлемі 950-1050 млн доллар аралығында болмақ, бұл алдыңғы айлармен салыстырғанда едәуір жоғары. Алайда, бұл соманың қаншасы бюджетке трансферттерге, қаншасы «Самұрық-Қазына» ҰӘҚ-ның инфрақұрылымдық жобаларын қаржыландыруға жұмсалатыны белгісіз.
БЖЗҚ-ның валюта үлесін 40% деңгейінде сақтау мақсатында Ұлттық Банк сәуір айында да валюта сатып алуды жалғастырады. Бұл көлем 250 млн доллардан аспайды. Дегенмен, нақты сатып алу көлемі нарықтық жағдайларға байланысты болатыны айтылған, бұл БЖЗҚ үшін жүргізілетін операциялардың мөлдірлігіне қатысты сұрақтар тудырады.
Сарапшылар Ұлттық банктің валюта бағамдарын көрсететін тақталарды алып тастау жайлы ережесіне де келіспейді.
«Біз бұл шараны командалық-әкімшілік тәсіл деп санаймыз және ол Қазақстанда толыққанды валюта нарығының дамуын шектейді. Валюта нарығын дамыту үшін валюталық операцияларды ырықтандыру, өтімділікті арттыру, әкімшілік кедергілерді азайту, туынды қаржы құралдарын дамыту, нарық қатысушыларының санын және әртүрлілігін көбейту қажет», – дейді Halyk Finance сарапшылары.
