Трамп әкімшілігі денсаулық сақтау саласындағы мыңдаған қызметкерлерді босатты
АҚШ президенті Дональд Трамп әкімшілігі денсаулық сақтау саласының 10 мың қызметкерін жұмыстан шығаруды бастады деп хабарлайды Reuters дереккөздерге сілтеме жасап.
Қысқартулар Денсаулық сақтау және әлеуметтік қызметтер министрлігінің бірнеше ірі агенттіктеріне, соның ішінде Азық-түлік және дәрі-дәрмек сапасын бақылау басқармасы (FDA), Ауруларды бақылау және алдын алу орталығы (CDC) және Ұлттық денсаулық сақтау институттарына әсер етті.
Қызметкерлерге олардың жұмыстан босатылғаны жайлы күзетшілер хабарлаған. Кейін олар Денсаулық сақтау және әлеуметтік қызметтер министрлігінің бірнеше кеңселері орналасқан Мэри Суитцер ғимаратына кірмек болған.
ҒDA-ның бір қызметкері Reuters-ке берген сұхбатында баспасөз қызметінің 17 қызметкері жұмыстан босатылғанын мәлімдеді. Сондай-ақ FDA-ның темекі өнімдері орталығының қызметкерлері де жұмыстан шығарылды, бұл темекі өнімдерін реттеуді іс жүзінде мүмкін емес етеді. Ұлттық аллергия және инфекциялық аурулар институтының директоры да жұмыстан босатылды.
Денсаулық сақтау министрі Роберт Ф. Кеннеди-кіші бұл қысқартуларды «шамадан тыс бюрократияны оңтайландыру үшін қажет» деп атады. Жалпы алғанда қызметкерлер санын 82 мыңнан 62 мың адамға дейін қысқартпақшы. Оның ішінде қоғамдық денсаулық сақтау, қатерлі ісік зерттеулері, вакциналар мен дәрі-дәрмектерді мақұлдау саласында жұмыс істеген жетекші ғалымдар да бар.
«Біз білетін FDA енді жоқ, институттық білімі мен өнімді әзірлеу және қауіпсіздігі саласында терең түсінігі бар басшылардың көпшілігі жұмыстан кетті. Менің ойымша, тарих бұл әрекетті үлкен қателік ретінде бағалайды», – деп жазды бұрынғы комиссар Роберт Кэлифф LinkedIn-де.
Кеннеди-кіші бұл өзгерістер министрліктің созылмалы аурулардың алдын алуға бағытталған негізгі миссиясына көңіл бөлуі үшін қажет болды деп мәлімдеді.
Бұған дейін Трамп білім министрлігін қысқартатын жарлыққа қол қойған еді. Құжатта ведомство ешкімді оқытпайтыны, мұндай мекемені ұстау үшін жылына қыруар ақша бөлінетіні айтылған.
