Қазақстанда наурыз айында іскерлік белсенділік төмендеді – Ұлттық банк

Ұлттық банк мәліметінше, Қазақстанда 2025 жылғы наурызда іскерлік белсенділік баяулап, индекс 50,4 болды. Бір ай бұрын мұндай көрсеткіш индексі 51,3 болған.

Есесіне іскерлік белсенділік өндіріс пен саудада артты. Оларда индекс аздап баяулағанына қарамастан, өндірісте 53,8, ал саудада 51,2 болып отыр (ақпанда – 54,1 және 51,5).

Тау-кен өндіру өнеркәсібінде көрсеткіш өзгеріссіз қалды (48,5). Ал қызмет көрсету және құрылыс секторында іскерлік белсенділіктің төмендегені байқалды. Оған жаңа тапсырыстар көлемінің төмендеуі әсер еткен. Қызмет көрсету индексі – 48,9,  құрылыс секторындағы индекс – 49,6 (ақпанда – 50,5 және 50,1).

2025 жылғы наурызда бизнес-ахуал индексі (БАИ) бизнес жүргізудің келешек жағдайына қатысты оптимизмнің жақсаруы есебінен 11,8-ге дейін (ақпандағы 9,9-дан) өсті, алайда қазіргі шарттарды бағалау көрсеткіші төмендеп отыр. Есесіне, бизнес-цикл «сағатының» индикаторы өсіп жатыр.  

Кәсіпорындардың бағалауы бойынша, олардың өнімдеріне/көрсетілетін қызметтеріне сұраныстың өсу қарқыны баяулаған. Дәл осындай жағдай тау-кен өндіру өнеркәсібінен басқа барлық секторда байқалып отыр. Ал қызмет көрсету секторында сұраныс төмендеді.

Ең жоғары сұраныс – өндірісте. Бизнес-жағдай факторларын бағалауда айтарлықтай өзгеріс жоқ. Респонденттер инфрақұрылымның өзгеруіне біршама оң баға берді, ал қалған факторлаға (бизнесті қорғау мәселесін, салық жүктемесін және қаржыға/кредитке қолжетімділікті) теріс баға берді, әсіресе, салық жүктемесіне және бизнесті қорғау мәселесіне.

Естеріңізге сала кетейік, Дүниежүзілік банк Қазақстанның 2025 жылғы қаңтар-ақпан айларындағы іскерлік белсенділігін жоғары бағалап, елдегі инфляция деңгейіне алаңдаған.