Түрік оппозициясы бір күн сауда жасамауға үндеді. Месут Озил құптамайды

Түркияда Ыстанбұл әкімі Экрем Имамоғлудың қамалуына қарсы наразылық акцияларын өткізіп жатқан оппозиция енді бір күн сауда жасамауға үндеді.

Осының алдында оппозиция билікке қатысы бар брендтер мен мекемелерге бойкот жариялаған. Оны қамауда отырған Имамоғлу да қолдаған.

Сәрсенбі күні оппозиция халықты бір күн сауда жасамауға шақырды. Соған байланысты елде дүкендердің кейбірі жабылып қалды. Кәсіпкерлер осы әрекеті арқылы Имамоғлуды қолдап, билік әрекетін сынағандармен бірге екенін білдірген.

Имамоғлуды Түркияны жиырма жылдан астам уақыт басқарып келе жатқан Режеп Тайип Ердоғанның басты саяси қарсыласы деп атайды. Ол 2025 жылғы 19 наурызда ұсталған. Ыстанбұл басшысына бірнеше ауыр айып тағылған.

Билік оппозицияның сауда туралы ұсынысын сынады

Елдің сауда министрі Өмер Болат оппозицияныңбір күн сауда жасамау туралы ұсынысын сынады.

«Мұндай әрекетті біз экономиканы тұралату әрекеті деп білеміз. Өздерін осы елдің қожайынымыз деп есептейтін топтың әрекетінен түк шықпайды», – дейді министр. Оның мәлімдемесін Reuters таратты.

Бұл уақытта үкімет мүшелері мен үкімет жағындағы танымал тұлғалар осы мәселеге қатысты ұстанымын #BoykotDegilMilliZarar («Бойкот емес, ұлттық шығын») хэштегімен жеткізді. Осындай хэштег қолданғандар арасында Германия футбол құрамасының, «Реал» клубының бұрынғы жартылай қорғаушысы Месут Озил де бар.

Оппозиция бастамасын Халық республикалық партия төрағасы Өзгүр Өзел жариялаған. Ол алдын халықты наразылық білдіру үшін көшеге шығуға үндеген. Кейінгі он жылда Түркияда ең ірі наразылық акциялары жүріп жатқанына екі апта болды. Президент Ердоған мұндай акцияларды «зұлымдық» деп атап, көп созылмайды деп болжаған.