Күзет фирмалары қызметін тоқтатқаннан кейін, қаруды полицияға тапсыруға міндетті болады
Елдегі күзет фирмалары қызметін тоқтатқаннан кейін, қару-жарақты полицияға тапсыруға міндетті болады. Мәжіліс депутаттары күзет ұйымдарына қойылатын талаптарды қатаңдатты.
Мәжіліс бірінші оқылымда «ҚР кейбір заңнамалық актілеріне күзет қызметі мәселелері бойынша өзгерістер мен толықтырулар енгізу туралы» жаңа заң жобасын мақұлдады. Құжатты таныстырған депутат Жарқынбек Амантай күзет қызметі мен мамандандырылған оқу орталықтарының жұмысын уәкілетті орган мен оның аумақтық бөлімшелері бақылауға алатынын айтты.
«Қару иелері үшін жаңа міндеттер енгізіліп отыр. Енді қару иелері – заңды тұлғалар өз қызметін тоқтата тұрған жағдайда 15 жұмыс күннің ішінде қару мен оның патрондарын ішкі істер органдарына сақтауға тапсыруға міндетті болады. Осылайша, бұл норма қаруды қылмыстық мақсатта пайдаланбау және ұлттық қауіпсіздікке төнетін қатерді болғызбау үшін енгізіледі», – деді мәжілісмен.
Ал Магеррам Магеррамов қазіргі заңнамада қаруды тапсыруға міндеттелмегенін айтады. Депутаттың мәліметінше, бүгінде елде қызметін тоқтатқан мыңнан астам, тіпті одан да көп күзет ұйымдары бар. Алайда олардың қарулары қайда екенін белгісіз. Сол себепті қару мен арнайы құралдардың бақылауда болуы маңызды деп санайды.
Сондай-ақ Магеррамов қосымша, жеке ұйымдар мен лицензияланған күзет компаниялары арасында қызметкерлерді тексеру үшін міндетті келісімшарттар жасалуы жоспарланып отырғанын айтты. ҚР ІІМ орынбасары қару мәселесі профилактикалық бақылау болып келсе, енді ол міндетті түрде тексерілетінін айтты. Бұдан бөлек, Астанадағы ұйым басқа аймақтан, мысалы, Ақмола облысынана объект алса, ол жергілікті полицияны хабардар етуі тиіс.
ІІМ мәліметінше, Қазақстанда барлығы 4 200 күзет ұйымы жұмыс істейді, оның ішінде 1600-1800 уақытша жұмыс істемейді. Ал күзетшілер саны 95 мыңды құрайды.
