Әлемдегі ең арзан «Мишлен» мейрамханалары

Жарияланды
Әлемдегі ең арзан «Мишлен» мейрамханалары/Фото: shutterstock

«Мишлен» жұлдызы — мейрамханадағы тамақтың қайталанбас дәмі мен жоғары сапасын көрсететін марапат. Ол ең үздік аспаздарға ғана беріледі. Сондықтан бір, екі немесе үш жұлдыз алған «Мишлен» мейрамханаларында үздік аспаздардың қолынан тамақ ішу қымбат тұрады, оны екінің бірінің қалтасы көтермейді. 

Бірақ кейінгі онжылдықта «Мишлен» марапатына көше тағамдары мен Азияның мейрамханалары да ілігіп, жоғары деңгейдегі гастрономиялық тәжірибе қолжетімді бола бастады. Бүгінгі материалымызда аз ақшаға үздік дәм ұсынатын «Мишлен» мейрамханаларын тізіп шықтық.

Taquería El Califa de León, Мехико

Мехико қаласындағы Taquería El Califa de León 2024 жылы «Мишлен» жұлдызын алып, осындай мәртебелі марапатқа қол жеткізген әлемдегі тако сататын жалғыз дүңгіршек атанды. Бұл дүңгіршекті 1968 жылы Хуан Эрнандес Гонсалес ашқан. Содан бері үздіксіз жұмыс істеп келеді. 

Тако — Мексиканың ұлттық тағамы. Жүгері немесе бидай ұнынан жасалған тортилья (шелпек) ішіне ет, көкөніс, теңіз өнімдері сияқты әртүрлі салма салынады. 

«Мишлен жұлдызын» алғалы такоға кезек бұрынғыдан да көбейген. Дүңгіршек таңғы 11-де ашылады, бірақ дүкен ашылмай тұрып, ұзын-сонар кезек түзіліп үлгереді. Кезегі келген адамды ішке шақырады, кассада тако түрін таңдап, ақшасын төлеп, тапсырысыңызды күтесіз. Екі данадан тұратын бір тако порциясы — 4 доллар (2015 теңге) тұрады. Дүңгіршекте алкоголь сатылмайды, оны сырттан әкеліп ішуге де болмайды. 

Дүкенде таконың қалай дайындалатынын көруге мүмкіндік бар. Тако салмасына артық дәмдеуіштер қосылмайды. Жай тұз бен лаймнан тұратын қарапайым тұздықтың өзі жұмсақ пісірілген, балғын етке ерекше дәм береді. Таконың жанына сальса сияқты ащы соус ұсынылады.

Мексикадағы көше тағамдарын сататын басқа көп дүңгіршек сияқты мұнда да карта қабылдамайды, тек қолма-қол ақшамен төлеу керек.

Hong Kong Soya Sauce Chicken Rice and Noodle, Сингапур

Бұл жер 2016 жылы Мишлен жұлдызын алған, әлемде осындай марапатқа ие болған алғашқы көше тағамдарының бірі. Мұнда сингапурдың ұлттық тамағы — тауық қосылған күрішті небәрі 2 долларға (1000 теңге)аласыз. Әдеттегідей кезек көп, тамақ ішетін орын өте қарапайым. Бірақ құпия рецептімен дайындалған күріштің дәмі тіл үйіреді. 

Бұл дүңгіршек Chinatown-дағы көше тағамдарын сататын орталықта орналасқан. Жолдың арғы бетінен дәл осы дүңгіршек иесі, аспаз Чан Хон Мэн өзінің атақты күрішін сататын жайлы мейрамхана ашып қойған. 

Бірақ «Мишлен» жұлдызы аспаздың Сhinatown-дағы қарапайым дүңгіршегіне берілген. Иесі бір болғанымен, жаңа ашылған мейрамхана бұл марапатты бөлісе алмайды. Сондықтан «Мишлен» жұлдызын алған дүңгіршектен ас ішу маңызды болса, шағын дүкенге, отыратын жеріңіздің жайлылығы мен атмосферасына басымдық берсеңіз, мейрамханаға барыңыз. Қос орында да бір аспаздың рецептісімен дайындалған, «Мишлен» гайдына көше тағамдары деген жаңа тарау қосқан күріштен дәм тата аласыз.

Raan Jay Fai, Бангкок, Таиланд

Бұл дәмхананы 1980 жылы Супинья Джунсу ашқан. 2019 жылы Netflix-те 76 жастағы аспаз туралы «Street food» деген шоу жарық көрді. Мейрамханаға Джон Ледженд, Марта Стюарт, Рассел Кроу сияқты көп танымал тұлғалар қонақ болған. 

Бұл атақ 2017 жылы француздық «Michelin» компаниясының Таиландтағы үздік мейрамханалар гайдын жариялап, көше тағамын сататын елеусіз «Raan Jay Fai» дүңгіршегіне бір «Мишлен» жұлдызын беруінен басталды. 

12 атақты мейрамханамен қатар, қарапайым дәмхананың осындай марапат алуы бүкіл әлемнің назарын аударды. Небәрі бір аптадан кейін Супинья Джунсу «Мишлен» жұлдызын қайтарып беруге болмайтыны өкінішті» деп сұхбат берді. Өйткені дүңгіршек алды Мишлен инспекторларын есінен тандырған «теңіз шаяны омлетін»жеуге келген адамдарға лық толды. 

Содан бері Супинья Джунсу жексенбіден басқа күндері түскі 15:00-ден түнгі 1:00-ге дейін ыстық ошақтың жанында тұрып, қолынан табасы түспей, бел жазбай жұмыс істейді. Адам көп болғандықтан, қазір дәмхана үстелдерге алдын-ала бронь қабылдайтын болған. 

Бангкоктағы басқа көше тағамдарымен салыстырғанда, мұнда баға қымбаттау. Бірақ аспаз Джунсу тамаққа тек қымбат, сапалы өнімдерді ғана пайдаланатынын, «Мишлен» жұлдызын алғалы мәзір бағасын мүлде көтермегенін айтады.

Auntie Gaik Lean’s Old School Eatery, Пенанг аралы, Малайзия

Auntie Gaik Lean’s Old School Eatery — 2023 жылы желтоқсанда Малайзия бойынша Мишлен гайды жарық көргенде, «Мишлен» жұлдызын алған төрт мейрамхананың бірі. Мейрамхана иесі Гаик Лин мен ұлы Адриан мұнда перанакан тағамдарын сатады. 

Перанакан — ХV-XVII ғасырларда Малакка жартытүбегіне көшкен қытай иммигранттардың ұрпақтарына қатысты қолданылатын термин. Перанакандардың көбі өз мәдениеті мен ұлттық тағамдарын көзінің қарашығындай сақтап келеді.

Гаик Лин аспаздықтан арнайы білімі болмаса да, әлі күнге дейін көп тағамды өзі дайындайды. Қарапайым перанакан үй тағамдарын он жыл бойы махаббатпен дайындау Гаик Линге «Мишлен» жұлдызын әперді. 

Мейрамханаға кезек көп, сондықтан кемі екі апта бұрын орын алу керек. Мәзір бағасы қолжетімді, тіскебасарлар 1,80 доллардан басталады. 

Сонымен қатар шетелде қазақтың асын ұсынатын мейрамханалар да бар. Қазақтың ас мәзірі ұсынылатын шетелдік мейрамханалар тізімін мына жерден көре аласыз.

Сондай-ақ оқыңыз