28 жастағы кәсіпкер Раулан Жалеев – пандемия кезінде бизнес бастағандардың бірі. Ол Rol Rugs шеберханасын құрып, кілем кәсібін дөңгелетіп отыр. Раулан бала күнінен ұшқыш болуды армандап, бұл салада бірнеше жыл қызмет еткен. Алайда артынша мұның өту қажет болған меже екенін түсініп, кәсіпке бет бұрған. Kursiv.Media тілшісі жас кәсіпкердің оқиғасын тыңдап, кілем бизнесінде қанша пайда табуға болатынын білді.
«Алғашқы млн теңгені жарты жылда таптым»
«Пандемия басталған тұста шетелден Қазақстанға келдім, әрі қарай қызмет бойынша Еуропаға кетуім керек еді. Сол уақытқа дейін кәсіппен айналысамын деп армандаған да емеспін. Ойымда тек көк аспан, ұшақтар ғана болды. Әлеуметтік желіде нақты тұтынушының тапсырысына сәйкес сипат беріп жасалатын кілем туралы көрдім. Қазақстанда, тіпті Азияда 4 жыл бұрын бұл ниша бос тұрды. Алматыдағы пәтерімде отырып алғашқы өнімді жасадым. Қазір осы салада монополист болдым дей аламын. Тапсырыс Қазақстаннан бөлек Канада, Ресей, Еуропа елдерінен де түседі», – дейді Раулан Жалеев.
Айтуынша, Раулан еңбекке 6 жасынан бастап араласқан. Алматы маңындағы елдімекенде тұрған ол мектепте оқып жүргенде автобуста кондуктор болған. Тапқан табысын ата-анасына беріп, қолғабыс еткен.
«Ол кезде менің басты мақсатым ұшқыш болу еді. Ол межеге жеттім деп ойлаймын. Ұшқыш ретінде 800 сағат ұштым. Содан кейін мұның менің өзіме ата-анамның маған таңып қойған мақсаты екенін, бұл мен расымен де айналысқым келетін іс емес екенін түсіндім. Ал кілем кәсібін бастаймын деген ойдан бұрын өзіме рахат сыйлайтын жұмыспен айналысатынымды білдім. Қазір әлеуметтік желіде блог жүргіземін. Ол жерде қарапайым баланың кәсіпке қалай келгенін көрсетемін. Адамдар қарапайым оқиғаларды көріп, бізге сенім артады, тапсырыс береді», – дейді ол.
Айтуынша, қазір қол астында оннан аса адам қызмет етеді. Одан бөлек әлеуметтік желіге жауап беретін мамандар бар.
«Алғашқы миллион теңгемді кәсіпті бастаған соң, жарты жылдан кейін таптым. Ал қаражатты өзімнің, кәсіптің дамуына жұмсадым. Себебі кілем тігуді ең әуелі әлеуметтік желідегі қытайлық блогерлердің видеосына қарап үйренген едім. Әрі қарай көпшілік алдында сөйлеуге дейін мамандардан дәріс алдым», – дейді Раулан.
Таза табысы айына 20 млн теңге
Раулан Жалеев 4 жыл ішінде кілем бағасы да өсіп жатқанын айтады. Ал айына орта есеппен 20-30 тапсырыс түседі.
«Біздің кілемнің бағасы қымбат, оның себебі де бар. Біз арнайы құрылғыны қосып, автоматтандырылған жүйеде жұмыс істемейміз. Қызметкерлер әрбір кілемді өзі тоқиды. Соған сәйкес еңбекақы төленеді. Бұл салада бәсеке аз болғандықтан, төрт жыл бойы бағаны да қымбаттатып келеміз. Ал бір айдағы тұрақты таза табыс шамамен – 20 млн теңге», – дейді ол.
Кәсіпкерден ең алғашқы өнімін қанша теңгеге бағалағанын да сұрадық. Айтуынша, бастапқыда тек шыққан шығынды, яғни материал бағасын ғана есептеген.
«Мүлде тәжірибем болмады. Сатып алушымен қалай сөйлесу керек екенін де білмедім. Бағасын сұраған адамға 20-30 мың теңге деп айттым. Ол кезде мен үшін шыққан шығынымды өтегені маңызды болды», – дейді Раулан.
