Азаматтық некедегі әйелін өлтіріп, 24 жылға сотталған экс-министр Қуандық Бишімбаевтың отбасы оның бұрынғы некесінен туған балаларына алимент төлеуден бас тартты. Бұл туралы оның бұрынғы әйелі Назым Қаһарман желідегі парақшасында айтты.
Ол жаңалықты экс-күйеуінің адвокатынан естіген. Заңгердің сөзінше, Бишімбаевтың анасы күйеуінің шығыны көп әрі балалар олармен араласпайтындықтан, алимент төлеуден бас тартатынын айтқан.
Бишімбаев адвокаты арқылы бар мүлкі анасының атына рәсімделгендіктен, алиментті төлеу соның мойнында екенін, енді алимент төлеу үшін түрмеден жұмыс тауып алуын күте тұруды сұраған.
Назым Қаһарман Бишімбаевтың әулетін «тозақ әулет» деп атап, олармен арадағы мәселеге тезірек нүкте қойғысы келетінін, оны Жоғарғы сот қойып қалар деп үміттенетінін жеткізді.
Бишімбаевтың бірінші әйелінен төрт баласы бар.
Бұған дейін, әлеуметтік желіде Бишімбаевтың әкесі жекеменшік университет ашқалы жатыр деген ақпарат тараған. Алайда Ғылым және жоғары білім министрлігі мұны растамады.
