Тик-ток желісінде алғашқы жарнасыз, бөліп төлеп алуға болатын көліктердің жарнамасынан көз сүрінеді. Kursiv.media сондай жарнама арқылы көлік алған Алматы тұрғынымен сөйлесіп, мәселенің мәнін ұғуға тырысып көрді.
Асан көлік аларда түрлі ұсыныстарды қарап, тик-токтағы жарнамаларға кезіккен. Тыңдаса, машинаны құдды өз бағасына беретіндей. Қызықпау мүмкін емес. Алғашқы жарнасы аз немесе мүлде жоқ адамдар үшін де үлестіріп жатыр.
Сондай салондардың біріне барады да су жаңа Chevrolet Monza-ны тізгіндеп қайтады. Кейіпкеріміз бір күнде аз ақшамен көлік алу жағы тиімді демесең, мұндай жарнамалардағы көліктерде ешқандай да бөліп төлеу жоқ екенін айтады.
8 млн-дық көлік алдымен 10,8 млн, кейін 14,5 млн-ға айналады
Сонымен Асан барған салонда Chevrolet Monza қолма-қол ақшаға 8 млн теңгеге бағаланған. Бұл нарықтағы арзан баға емес, ақшаң дайын болса, 7 млн теңгеге де табасың. Кейіпкеріміз несиеге алам дегенде, салон оның бағасы 10 млн 800 мың теңге болатынын айтқан. Алғашқы жарна ретінде 800 мың теңге құюы керек.
Бөліп төлеу деген нәрсе осы жерден шығады. Егер көліктің несиесін 2 жылда толық өтеп тастаса, артық төлем болмай, Monza-ның құны сол 10 млн 800 мыңға айналады. Алайда көлік 7 жылға рәсімделеді. Несиесін 2 жылда жапсаң, жоғарыдағы соманы төлейсің, ал толық 7 жыл төлесең, көліктің жалпы құны 14,5 млн теңгеге шығады.
Асанның айтуынша, алғашқы жарнасы жоқтарға жетпей тұрған ақшаны салон өзі құйып, ол соманы көліктің жалпы бағасына қосатын көрінеді.
Міне, тик-токтағы алғашқы жарнасыз, бөліп төлеп алуға болады деген көліктердің жағдайы қысқаша осылай.
Бұған дейін, Қытай көліктеріне 5 жылдан кейін не болады туралы жазғанбыз.
