Асхат Аймағамбетов мектептердегі күзетті күшейтуді ұсынды
Мәжіліс депутаты Асхат Аймағамбетов еліміздегі мектеп қауіпсіздігіне қатысты пікір білдірді. Депутаттың айтуынша, соңғы жылдары вахтерлердің орнына кәсіби күзет ұйымдарын енгізу бастамасы жүзеге асқанымен, шынайы өзгеріс орын ала қойған жоқ.
Аймағамбетов бұл туралы өзінің әлеуметтік желідегі парақшасында жазды. Экс-министр мектептердегі күзет қызметінің қазіргі ахуалын шынайы түрде сипаттап, бірқатар нақты ұсыныс айтты.
«Біз «вахтер» деген сөзді «күзетшіге» ауыстырдық. Ал іс жүзінде – сол баяғы адамдар. Көп жағдайда – жасы алпыстан асқан апа-аталар. Кейде тіпті бұрынғы вахтерлерден де алшақ, мектептің ішкі өмірінен бейхабар адамдар күзет қызметін атқарып жүр», – деп жазды депутат.
Аймағамбетовтің пікірінше, басты себеп – мемлекеттік сатып алу жүйесінің кемшіліктері. Күзет қызметін көрсететін ұйымдар көбінесе тендерді жеңу үшін ең төмен баға ұсынады. Ал сапа екінші кезекке ысырылады. Соның салдарынан дайындықсыз, жиі ауысатын, кейде бейресми түрде істейтін адамдар жұмысқа алынады.
«Мектеп – жай ғана ғимарат емес, бұл – балаларымыздың екінші үйі. Ал оны қорғау – жай ғана «отыр» дей салатын жұмыс емес», – дейді Аймағамбетов.
Сондай-ақ ол күзет ұйымдарына қойылатын талаптардың тым әлсіз екенін, мектепте ресми түрде бір адам тіркеліп, іс жүзінде басқа адамның жұмыс істейтінін де атап өтті. Бір ғана күзет постына қаржы бөлінуі – тағы бір өзекті мәселе.
Осыған байланысты депутат төрт нақты ұсыныс білдірді:
- Ішкі істер министрлігі күзет ұйымдарына қойылатын лицензиялық талаптарды күшейтуі керек – күзетшінің жасы, білімі, дайындығы нақты жазылуы қажет;
- Ел бойынша бірыңғай стандарт қабылдануы тиіс;
- Мектептің көлемі мен оқушы санына қарай күзет посттарының нормативі бекітілуі қажет;
- Мемлекеттік сатып алу тетіктерін жетілдіру қажет – баға емес, сапа басымдыққа ие болуы тиіс.
Аймағамбетов бұл ұсыныстарды Ішкі істер министрлігі мен тиісті мемлекеттік органдардың қарауына ұсынатынын жеткізді.
Еске сала кетейік, бұған дейін Мәжіліс депутаттары күзет ұйымдарына қойылатын талаптарды қатаңдатқан еді.
