Minecraft жанкүйерлері де сүйікті әлемін үлкен экранда тамашалай алады. Әлемге әйгілі Minecraft ойыны енді үлкен экранға шықты. 3 сәуірден бастап бұл қызықты фильм қазақстандық кинотеатрларда көрсетіліп жатыр.
Сюжет желісі төрт ойыншының кенеттен Minecraft әлеміне тап болуымен басталады. Олар өз үйлеріне оралу үшін Стив есімді қызықты кейіпкермен күш біріктіріп, қауіпті құбыжықтарға қарсы күреседі. Фантазиялық әлемді құтқарған жағдайда ғана өз әлемдеріне қайта алады.
Фильмде басты рөлдерді Джек Блэк, Джейсон Момоа және Эмма Майерс сомдайды. Әсіресе Джек Блэк өзінің актерлік өнерінен бөлек, музыкалық қабілетін де көрсетеді.
Бұл — Minecraft ойынының алғашқы экранизациясы. Студия өкілдерінің айтуынша, бұл жоба әлемдегі ең танымал ойындардың біріне құрмет ретінде түсірілген.
Бір минуттық тизер Warner Bros. студиясының ресми YouTube арнасында жарияланып, көрермендерге фильм атмосферасын алдын ала сезінуге мүмкіндік берді.
Айта кетейік, 2011 жылы шыққан Minecraft ойыны уақыт өте келе әлемнің ең көп сатылатын ойынына айналды. ActivePlayer.io мәліметінше, 2023 жылы ай сайын 178 миллион адам ойынды ойнаған, ал жалпы сатылым 300 миллион данадан асқан.
Еске сала кетейік, бұған дейін «Меломан» компаниясы Disney-дің «Моана 2», «Муфаса: Арыстан патша» және «Ақшақар» фильмдерінің қазақ тіліне дубляждалған нұсқалары шыққан еді.
