Перизат Қайратқа қатысты қылмыстық іс бойынша тергеу аяқталды. Бұл туралы Қаржылық мониторинг агенттігі төрағасының орынбасары Жеңіс Елемесов Сенаттың кулуарында мәлім етті.
«Перизат Қайратқа қатысты қылмыстық іс аяқталды. Қазіргі уақытта процестің қатысушылары қылмыстық іс материалдарымен танысу сатысынан өтіп жатыр», — деді Елемесов.
Жеңіс Елемесов тергеу барысында залал көлемі бірнеше рет өзгергенін айтып өтті. Қазір нақты сома 3,5 млрд теңге деп белгіленіп отыр.
«Тергеу барысында әртүрлі залал сомалары айтылған еді. Қазіргі таңда біз 3,5 млрд теңге залал келтірілген деген қорытындыға келдік»,
Сонымен қатар, ҚМА қылмыстық жолмен табылған ақшаны заңдастыру фактілерін де түсіндірді. Тергеу мәліметіне сәйкес, Перизат Қайрат ақшаны гүл салонына салу арқылы заңдастырған.
Ақшаны заңдастыру мәселесіне келсек, Перизат Қайрат «Rebel Flowers» гүл дүкенін сатып алу арқылы өзіне іскер әйел имиджін қалыптастырды. Осылайша, ол қоғам алдында заңды кәсіпкер ретінде көрінуге тырысты, — деді ҚМА өкілі.
Журналистер Перизат Қайраттан тәркіленген мүлік пен қымбат әшекейлері туралы сұрағанда, Елемесов бұл мәселемен сот айналысатынын айтты.
«Бұл мүліктердің қайда кететінін сот шешеді. Бір нұсқа бойынша, олар зардап шеккендерге, яғни қайырымдылыққа ақша аударған азаматтарға өтемақы ретінде берілуі мүмкін. Ал екінші нұсқа — ол мемлекет кірісіне аударылуы мүмкін», – деді Елемесов.
Еске сала кетейік, 2024 жылдың қараша айында Перизат Қайрат 1,5 млрд теңге көлемінде қаражатты жымқырды деген күдікке ілінген. Қаржылық мониторинг агенттігі ол ақшаны сән-салтанат бұйымдары мен жылжымайтын мүлікке жұмсағанын мәлімдеген еді.
