Еуропа қайта құру және даму банкі Қазақстанға 2 млрд еуро инвестиция салуға дайын

Самарқандта өткен саммит аясында Қазақстан Президенті Қасым-Жомарт Тоқаев Еуропа қайта құру және даму банкінің (ЕҚДБ) президенті Одиль Рено-Бассо ханыммен кездесу өткізді. Кездесу барысында банк Қазақстандағы бірқатар жобаларға 2 миллиард еуро көлемінде инвестиция салуға дайын екенін мәлімдеді. Бұл туралы Ақорда хабарлады.

«Одиль Рено-Бассо банк тарапынан қаржыландырылатын «жасыл» өтпелі кезең бағдарламасының жаңартылған мәліметтерін ұсынды. Аталған бағдарламаға 2 млрд еуро көлемінде қаражат құю көзделуде», – делінген ресми ақпаратта.

Мемлекет басшысы өз кезегінде Қазақстандағы банк секторын дамытуға қосқан үлесі үшін ЕҚДБ басшылығына алғысын білдірді.

Ақорданың мәліметінше, 2024 жылдың өзінде Қазақстан Үкіметі мен Еуропа қайта құру және даму банкі 25 жобаға 935 миллион АҚШ доллары көлемінде қаржыландыру жөнінде келісімге келген.

Айта кетейік, ЕҚДБ – Қазақстандағы ірі халықаралық қаржы серіктестерінің бірі. Оның қолдауымен елімізде инфрақұрылым, энергетика және экология бағытында көптеген жобалар жүзеге асырылып келеді.

Бұған дейін Қасым-Жомарт Тоқаев Еуропалық кеңес президентімен кездескен еді.