Жеті жыл бұрын Сирияға барып, туыстарын терроризмге үгіттеген әйел сотталды

Ұлытау облысында 2017-2018 жылдары Сирияға барып, әлеуметтік желілер арқылы Қазақстандағы туыстарын терроризмге үгіттеген әйел 7 жылға сотталды. Бұл туралы Жезқазған қалалық сотының баспасөз қызметі хабарлады.
«Жезқазған қалалық сотында телекоммуникация желілерін пайдаланыла отырып, терроризмдi насихаттау, сол сияқты көрсетілген мазмұндағы материалдарды тарату мақсатында сақтау және тарату бойынша сотқа берілген «Б.»-ға қатысты қылмыстық іс қаралды», – делінген баспасөз хабарламасында.
Мәселенің мән-жайы
Сотталушы «Б.» 2017 және 2018 жылдар аралығында Сирия Араб Республикасында болған. Сол кезеңде ол «Telegram» месенджерінде ойдан шығарылған аккаунт ашып, оны қылмыстық мақсатта пайлаланған. Ол сол аккаунт арқылы Ұлытау облысы, Сәтбаев қаласында тұратын жақын туысқанымен хат алмасып, терроризмді насихаттаған. Сонымен бірге ұялы телефонында терроризмді насихаттау белгілері бар радикалды діни материалдарды тарату мақсатымен сақтаған.
Сот үкімі
Прокурор сотталушыға 7 жыл бас бостандығынан айыру жазасын тағайындауды сұраған. Әйел прокурор таққан айыпты толық мойындап, жазаны жеңілдетіп, бас бостандығынан айырмауды сұраған.
Сот сотталушыны ҚК-нің 256-б. 2-бабы бойынша кінәлі деп тапқан.
«Жезқазған қалалық сотының үкімімен «Б.» ҚК-нің 256-б. 2-б. бойынша кінәлі деп танылып, оған 7 жыл мерзімге бас бостандығынан айыру жазасы тағайындалды, жазаны қылмыстық-атқару жүйесінің орташа қауіпсіз мекемесінде белгіленді», – деп хабарлайды баспасөз қызметі.
Сот шешім қабылдамас бұрын, қылмыстық құқық бұзушылықтың сипаты мен қоғамға қауіптілік дәрежесін ескерген. Сотталушының әрекетінен қоғамға, қоғамдық тәртiпке қауіпті мән-жайлар анықталған. Сол себепті осындай баламасыз жаза тағайындалған.
Сотталған әйелдің кәмелетке толмаған балалары бар. Оларға қамқорлық белгілеу мәселесін қамқоршылық және қорғаншылық органы шешеді.