Қазақстанда TikTok неге баяу жұмыс істейді?

Балаева Қазақстанда TikTok өте баяу жұұмыс істеуіне платформада зиянды контенттің көбейгені себеп болғанын айтты / Фото: shutterstock; бильд-редактор: Ахтам Зиперов

Соңғы уақытта Қазақстанда TikTok өте баяу жұмыс істей бастады. Платформадағы видеолар ұзақ жүктеледі. Мұның себебін Мәдениет және ақпарат министрі Аида Балаева түсіндірді.

Заңсыз контент

Министр TikTok платформасынан көп заңсыз контент анықталғанын айтады. Ал заңсыз контент көп болған сайын, министрлік мұндай әлеуметтік желінің трафигін азайта түседі.

«TikTok трафигін Мәдениет және ақпарат министрлігі реттейді. Жалпы трафикке әлеуметтік желі әкімшілерінің жұмысы әсер етеді. Біз әлеуметтік желіге үнемі мониторинг жүргізіп отырамыз. Егер заңға қайшы контент анықталса, сол компания әкімшілігіне хабарлама жіберіп, мұндай контентті жоюды талап етеміз. TikTok әлеуметтік желісінен біз көптеген заңға қайшы келетін контентті анықтап, компаниядан мұндай контентті жоюды сұрадық. Бұл орайда TikTok әкімшілігіне алғысымды білдірем. 1,5 ай бойы екі тарап бірлесе жұмыс істеп, анықталған зиянды контенттің 80%-ға жуығы жойылды», – деді министр.

Аида Балаева басқа әлеуметтік желілерді де осындай ынтымақтастыққа шақырды. Сондай-ақ заңсыз контентті жоймаған әлеуметтік желінің трафигі азаятынын ескертті.

«Министрліктің заңсыз контент жойылмаған жағдайда заңды негізде трафикті азайту құқы бар», – деді Балаева.

Министр әлеуметтік желілердің жүйелі жұмыс істеуіне тұтынушылардың да әсер ететінін еске салды.

Еске сала кетсек, кеше, 2 сәуірде Цифрлық даму, инновациялар және аэроғарыш өнеркәсібі министрі Жаслан Мәдиев TikTok желісінде трафикті реттеу құзыреті Мәдениет және ақпарат министрлігінде екенін айтты. Сондай-ақ платформаға қосылуда VPN пайдаланбауға кеңес берді.