АҚШ-та Трамптың рейтингі төмендеп кетті. Америкалықтарға не ұнамады

Жарияланды
General News бөлімінің редакторы
Америкада Трамптың рейтингі төмендеп жатыр / Фото: kursiv.media архив

АҚШ президенті Дональд Трамптың рейтингі төмендеп жатыр. Reuters басылымы жүргізген сауалнамаға сенсек, президент рейтингі 43%-ға дейін түскен. Бұл – екінші мерзімге сайланғаннан бергі ең төменгі көрсеткіш.

Сауалнама 3 күнге созылған. Сауалнама нәтижесінен Америка халқына Дональд Трамптың атқарып жатқан жұмысына көңілі толмайтынын аңғаруға болады. Көпшілікке әсіресе, әскери құпияны сақтауда жіберген президент әкімшілігінің олқылықтары ұнамаған. Сонымен бірге соңғы уақытта АҚШ-та енгізіліп жатқан тарифтік шараларды да халық көп қолдамайтынын аңғаруға болады.

«Сәрсенбіде аяқталған үш күндік сауалнама Трамптың президент ретіндегі жұмысын мақұлдау рейтингі 21-23 наурызда жүргізілген сауалнамаға қарағанда 2 пайыздық тармаққа төмен және 20 қаңтарда қызметіне кіріскеннен кейін көп ұзамай алған 47 пайыздық қолдаудан 4 ұпай төмен екенін көрсетті», – деп жазады басылым.

Ал бірінші президенттік мерзімде Трамптың рейтингі шарықтаған тұс – 2017 жылдың қаңтары. Ол кезде АҚШ президентінің рейтингі 49%-ды құраған. Жалпы бірінші мерзімде бұл көрсеткіш 33%-ға дейін түскен.

Халыққа не ұнамады?

Сауалнамаға қатысқан респонденттердің жартысынан астамы, яғни 52%-ы Трамптың кедендік баж салығын көтеріп тастағанын ұнатпаған. Көпшілік енгізіліп жатқан жаңа тарифтердің жақын адамдарына зиян тигізетінін айтқан. Қатысушылардың көбі тарифтердің пайдасынан гөрі көп зияны көп деп санайды.

Екіншіден, халыққа Ақ үй әкімшілігінің әскери құпия мәселелерді еш қорғалмаған ортақ чаттарда талқылайтыны ұнамаған. Түсіндіре кетсек, өткен аптада жоғары лауазымды шенеуніктердің Signal коммерциялық хабар алмасу қосымшасындағы чатта Йемендегі содырларға шабуыл жасау жоспарларын талқылаған белгілі болды. Сондай-ақ ол чатқа абайсызда журналист қосылып, әскери құпияны біліп қойған. Бұл жағдайдан соң, Трампқа деген халық сенімі біршама төмендеген. Сауалнамаға қатысқан респонденттердің 70%-ы бұл олқылықты Трамп өз мойнына алуы керек деген пікір білдірген.

Сондай-ақ оқыңыз