Алматыда сағатына 300 шақырым жылдамдықпен жүйткіген көлік иесі іздестіріліп жатыр (видео)
Алматы көшелерінің бірінде сағатына 300 шақырым жылдамдықпен жүйткіп, жарысқан көліктердің иелері іздестіріліп жатыр.
Полиция жауапкершілікке тартуға уәде берді. Әлеуметтік желілерде Алматы қаласының Әл-Фараби көшесінде таңсәріде жарыс ұйымдастырғандардың бейнежазбасы тарады.
Онда белгісіз автокөлік жүргізушілері сағатына 200,230 шақырым жылдамдықпен жүргені көрінеді. Кейде тіпті жылдамдықты 300 шақырымға дейін жеткізген.
Айта кететін жайт, бұл көшеде сағатына 60-80 шақырым жылдамдықпен жүруге ғана рұқсат етілген.
«Бұл адамдарға не көрінді? Бұл жаңа қауіпті челледж бе? Немесе хайп қуу ма? Әлде бақылау жоқ екенін біліп, жазаға тартылмаймын деп ойлай ма?» – деп, тұрғындар наразылығын білдіріп жатыр.
Алматы қалалық полиция бұл бейнежазбаға түсініктеме беріп отыр.
«Бұл дерек бойынша Алматы қаласының ПД жергілікті полиция қызметінің басқармасы жол ережесін бұзушыларды тауып, заң бойынша әкімшілік жауапкершілікке тартады», – деп уәде берді.
Мұның алдында қала әкімі Ерболат Досаев Алматыда электросамокаттар қозғалысы қалай реттеліп жатқанын айтты.
