Трамптың шешіміне әлем қалай жауап берді
Еуропалық Одақ АҚШ-тың еуропалық тауарларға енгізген импорттық тарифтеріне лайықты жауап беруге дайын. Бұл жайлы Еурокомиссия төрайымы Урсула фон дер Ляйен мәлімдеді.
«АҚШ президенті Дональд Трамптың бүкіл әлемге, оның ішінде Еуроодаққа да ортақ тариф енгізуі – жаһандық экономикаға ауыр соққы,» – деді ол.
Фон дер Ляйеннің пікірінше, кедендік тарифтердің енгізілуі инфляцияның өсуіне, жеткізу тізбектерінің бұзылуына, АҚШ-пен бизнес жүргізу шығындарының артуына әкеліп соғады. Бұл, әсіресе, дамушы елдер мен әлеуметтік осал топтарға кері әсер етеді.
ЕО өз мүдделері мен бизнесін қорғау мақсатында жауап ретінде жаңа кедендік баж салықтары пакетін дайындап қойғанын ескертті.
«Дегенмен балама жол бар, келіссөз жүргізу үшін әлі кеш емес», – деп қосып өтті Еурокомиссия басшысы.
Ол Трамптың әлемдік сауда жүйесіндегі кемшіліктерге қатысты пікірін қолдағанымен, баж салықтарын енгізу бұл мәселені шешпейтінін атап өтті.
Дональд Трамп оншақты ел мен ЕуроОдақтан әкелінетін тауарларға кедендік баж салығын енгізу туралы жарлыққа қол қойды. Ол шетелдік көшбасшыларды АҚШ-тың жаңа баж салығын төмендету үшін өз елдеріндегі тарифтерді жоюға шақырды.
«Маған жуық арада қоңырау шалып, АҚШ тарифтерінен босатуды сұрайтын барлық шетелдік президенттер, премьер-министрлер, корольдер, королевалар, елшілер және басқаларға айтарым – алдымен өздеріңіздің тарифтеріңізді жойып, саудадағы кедергілерді алып тастаңыздар!» – деді Трамп.
Әлем елдерінің реакциясы қандай болды?
Аустралия (тариф – 10%) – премьер-министр Энтони Альбаниз АҚШ тарифтерін «мүлде негізсіз» деп атады.
Канада – Трамптың тізімінде болмаса да, ел қарымта шара қолданатынын мәлімдеді.
Бразилия – АҚШ-тың тарифтері Дүниежүзілік сауда ұйымы (ДСҰ) алдындағы міндеттемелерін бұзатынын айтты. Ел парламенті АҚШ-қа қарсы жауаптық шаралар қабылдау үшін заң жобасын мақұлдады.
Швейцария (тариф – 31%) – Президент Карин Келлер-Зуттер ел үкіметі бұл жағдайға шұғыл жауап беретінін мәлімдеді.
Қытай (тариф – 34% + бұрынғы 20%) – Сауда министрлігі АҚШ-тың тарифтерін «біржақты қысым көрсету» деп атап, жауап ретінде «айна» баж салығын енгізетінін ескертті.
Оңтүстік Корея (тариф – 25%) – Президент міндетін атқарушы Хан Док-су елді «жаһандық тарифтік соғыс» күтіп тұрғанын айтты. Үкімет АҚШ-пен келіссөздер жүргізіп, отандық кәсіпорындарға шұғыл қолдау көрсететінін мәлімдеді.
Жаңа Зеландия (тариф – 10%) – Сыртқы істер министрі Уинстон Питерс бұл ел үшін саудадағы бәсекелестік артықшылық болатынын айтты. Сауда министрі Тодд Макклей АҚШ-қа қарсы ешқандай жауаптық шара қолданбайтынын мәлімдеді.
