Ұлттық банк сарапшылары инфляция өсіп, экономикалық өсім баяулайтынын айтты

Ұлттық банк сарапшылар арасында сауалнама жүргізіп, олар инфляция мен экономиканың өсіміне қатысты болжамдарын қайта қарады. Мамандар Қазақстан экономикасы өсуі баяулайды, ал инфляция әлі де өсе түседі деген пікірде.

Ұлттық банк сарапшылары Brent маркалы мұнай бағасы 2025 -2026 жылдары 75-72 доллардан сатылады деп болжайды. Ал 2027 жылы қара алтын бір баррелінің бағасы 72,5 долларға өсуі мүмкін.

Ал ел экономикасы 2025-2027 жылдары өсімін баялатуы мүмкін. 2025 жылға арналған болжам 4,9%-тен 4,7%-ке, ал 2027 жылға – 4,5%-тен 4,3%-ке дейін қайта қаралды. 2026 жылға арналған экономика өсімі 4,5% деңгейінде сақталды.

Инфляция бойынша болжамдар да мәз емес. Ұлттық банк сауалнамасына қатысқан сарапшылар 2025-2027 жылдар аралығында инфляция деңгейі әлі де өсе түседі деген пікірде.

Осы жағдайларға байланысты сарапшылардың базалық мөлшерлеме бойынша болжамдары да өзгеріп, жоғары деңгейде қалыптасты. Ұлттық Банктің атап өтуінше, базалық мөлшерлеменің бағалауы бұрынғыдай жылдық орташа мәнмен емес, жыл соңындағы деңгеймен ұсынылады.

Реттеуші жүргізген сауалнамаға Қазақстан бойынша макроэкономикалық көрсеткіштерді талдаумен және болжаумен айналысатын 16 ұйым қатысты. Респонденттердің қатарына нарықтың кәсіби қатысушылары, зерттеу институттары, халықаралық ұйымдар мен рейтингтік агенттіктер кіреді.

Осыған дейін Дүниежүзілік банк Қазақстан экономикасына арналған болжамын жариялаған еді. Халықаралық ұйым ел экономикасының аяқ алысы жаман емес, бірақ инфляция алаңдатып отырғанын айтады.