OPEC+ өндірісті бірден ұлғайтып, мұнай одан сайын арзандады

Жарияланды (жаңартылды )
Business News бөлімінің тілшісі
OPEC+ шешімі мұнай бағасына әсер етті / фото: shutterstock

OPEC+ ұйымына мүше сегіз ел 2025 жылғы мамырда тәулігіне 411 мың баррель мұнай өндіруге келісті. Күтпеген шешім нарықта мұнай бағасының одан сайын төмендеуіне алып келді деп жазды Reuters.

АҚШ президенті Дональд Трамп әлем елдеріне баж салығын жариялаған соң, мұнай 4%-ға арзандаған. Сегіз ел өндірісті ұлғайтатынын жариялаған сәтте Brent маркалы мұнай 5%-ға арзандап, бір баррель 70 доллар болып қалды.

Бейсенбі, 3 сәуірдегі кездесу қарсаңында OPEC+ өндірісті біртіндеп – мамырда тәулігіне 135 мың баррельге көтереді деп айтылған. Алайда ұйымның онлайн кездесуінен кейін өндірісті келесі айда бірден 411 мың баррельге дейін көтеретіні жарияланды.

«Өндірісті біртіндеп ұлғайту нарықтағы жағдайға байланысты уақытша тоқтауы немесе тіпті алып тасталынуы мүмкін»- деп ескертті ұйым.

Бұған дейін ұйымға мүше Сауд Арабиясы, Ресей, БАӘ, Кувейт, Ирак, Алжир, Қазақстан және Оман өндірісті біртіндеп ұлғайтуға келіскен. Мамырға арналған жоспар соның келесі қадамы.

Сегіз ел енді 5 мамырда кездесіп, маусым айына арналған өндіріс көлемін анықтайды.

Естеріңізге сала кетейік, ұйымның бейсенбідегі кездесуінде Қазақстанның квотаны асырып жіберуі мәселесі қаралатыны айтылған. Себебі ұйымның басқа да мүшелері, соның ішінде Сауд Арабиясы Астананың квотаны 2024 жылдан бері қайта-қайта бұзғанына ашулы. Әзірге бүгінгі жиында осы мәселеге қатысты қандай шешім қабылданғаны белгісіз.

Сондай-ақ оқыңыз