Құлыбаевтың Жайық жағалауындағы жері мемлекетке қайтарылды

Атырауда миллиардер Тимур Құлыбаевқа тиесілі «Кипрос» компаниясының өзен жағалауындағы жері мемлекетке қайтарылды. Жоғарғы сот жер дауына байланысты түпкілікті шешім шығарды.

«Кипрос» компаниясы 2014 жылы Жайық өзені бойында орналасқан демалыс саябағынан 0,3 га жерді алған. Алайда 11 жыл бойы ол жерге ештеңе салынбаған. Соның өзі жерді мемлекетке қайтаруға себеп болды, өйткені жер телімін пайдаланбау заңнамаға қайшы.

Жер дауы қалай өрбіді

2022 жылы прокурорлар Құлыбаевтың жерін тексеріп, жер телімі пайдаланбай жатқанын анықтаған. «Кипрос» компаниясына оны пайдалануға бір уақыт берілген. Алайда қайта тексеру кезінде компания ешқандай әрекет жасамағаны анықталған. 2024 жылғы маусымда экономикалық сот жер телімін мемлекетке қайтару жөнінде шешім шығарды.

Алайда тамызда апелляциялық инстанция сот шешімін жойған. Сот алқасы «Кипрос» құрылысқа қатысты бірнеше құжат дайындап үлгергенін алға тартқан. Атырау облыстық жер ресурстарын басқару жөніндегі басқармасы мұндай шешіммен келіспей, шағым түсірген.

Жоғарғы сот шешімі

«Құрылыс жобасының келісімі мен сәулет кескіні жер телімін игеруге жатпайды, себебі ол алдын ала дайындық кезеңі ғана», – деп жазылған Жоғарғы сот үкімінде.

Бұған қоса, Жоғарғы сот апелляциялық сот алқасының бірінші инстанция шешімінің күшін жоюға заң тұрғысында негізі болмағанын анықтаған.

Құлыбаевқа тиесілі компаниялар бірінші мәрте жер телімінен айрылып отырған жоқ. Бұған дейін Kursiv.Media миллиардер компаниясы ҚазҰУ-дағы жер үшін таласта соттан жеңіліп қалғанын жазған.

Forbes мәліметінше, Динара мен Тимур Құлыбаевтардың әрқайсының байлығы – 5,3 млрд доллар.