Қазақстан үкіметі Трамптың салық саясатына қатысты мәлімдеме таратты

Жарияланды
Business News бөлімінің тілшісі
пошлины трамп
Дональд Трамп жаңа салық саясатымен бүкіл әлемді дүрліктірді / фото: REUTERS

Қазақстанның Сауда және интеграция министрлігі АҚШ-тың әлем елдеріне енгізген кеден баж салығына қатысты ресми мәлімдеме жасады. Дональд Трамп Қазақстанға 27% баж салығын белгілеген.

Сауда министрлігінің мәлімдеуінше, Қазақстанның АҚШ-қа экспортының көп бөлігі қосымша тарифтер санатына енбейді, себебі олардың дені салықтан босатылған тауарлар тізіміне кіреді.

«Қазақстан АҚШ-қа негізінен шикі мұнай, уран, күміс, ферроқорытпа және басқа да тауар экспорттайды. Олар тауарлардың 92 пайызын алады. Бәрі қосымша салықтан босатылады», – деп мәлімдеді сауда министрлігі.

Қосымша салық фосфор, феросилиций, линзалар, бидай глютені, аммоний нитраты секілді тауарларға салынады.

«Енгізілген тариф шаралары Қазақстанның АҚШ-қа экспортының жалпы көлемінің бар болғаны 4,8%-на ғана тиесілі болады», — деп есептейді Қазақстан билігі.

Астана америкалық тараппен Қазақстанға қосымша баж салығын салмау мәселесін талқылауды көздеп отыр.

Естеріңізге сала кетейік, АҚШ президенті Дональд Трамп әлем елдерінің тауарларына жаңа тарифтер белгілеп, оларды 3 наурызға қараған түні жариялаған.

Трамптың тарифтері Қазақстан экономикасына қаншалықты әсер ететінін жергілікті сарапшылар да есептеп жатыр.

Әлем экономикасындағы жағдай құбылып тұрған сәтте алтынға сұраныс артты. Себебі инвесторлар тұрақты актив іздейді.

Сондай-ақ оқыңыз