Қазақстан терроризмді қаржыландыруға қарсы шараларды күшейтті. Бүгін, 3 сәуірде, сенаторлар қылмыстық кірісті заңдастыру мен лаңкестікті қаржыландыруға қарсы әрекет жөніндегі құжатты қарады.
Сенатор Бекболат Орынбеков құжаттағы негізгі өзгерістерге тоқталды.
«2012 жылы ФАТФ ұсынымдары ауқымды түрде қайта қаралып, мандаты кеңейтілді, нәтижесінде жаппай қырып-жою қаруын таратуды қаржыландыруға қарсы іс-қимыл мәселелері қосылды. Хаттамада «ерікті жарна», «нысаналы ерікті жарна», «өзге түсімдер», «нысаналы қор» деген ұғымдық аппарат анықтамаларымен толықтырылды. Осылайша, Еуразиялық топтың бюджетін қалыптастыру көздері күшейтілді», – деді ол.
Оның айтуынша, топқа мүше 9 мемлекеттің жетеуі Хаттаманы ратификациялады. Ал, Қазақстан мен Қытай бұл құжатты ратификациялау бойынша ішкі мемлекеттік рәсімдерін жүргізіп жатыр.
«Хаттамадағы түзетулер Еуразиялық топ мақсаттары мен міндеттерін, үлестік жарналарды төлеудің параметрлері мен мерзімдерін нақтылауға, қосымша жұмыс форматтарын құруды регламенттеуге және қазіргі бар кемшіліктерді жоюға бағытталған. Заңның қабылдануы теріс әлеуметтік-экономикалық және құқықтық салдарға әкелмейді, республикалық бюджеттен қосымша қаржы шығындарын талап етпейді«, – деді депутат.
Қаржылық мониторинг агенттігі төрағасының орынбасары Жеңіс Елемесов Қазақстанда әзірге терроризмді қаржыландыру бойынша дерек тіркелмегенінін айтады. Дегенмен үнемі сараптама жасалып, жағдай назарда болады деп сендірді. Күдікті транзакцияларды байқаған жағдайда, құзырлы органдардың қарауына жіберілетінін атап өтті.
Қазақстанда 4 жыл ішінде заңсыз ақша айналымы төмендеп, ақшаны жылыстату және терроризмді қаржыландыру тәуекелі азайған. «Basel AML Index» рейтингіне сәйкес, Қазақстан ақшаны жылыстату тәуекелі жоғары 110 елді артта қалдырып, 111-орынға тұрақтаған. ҚМА бұл рейтингте Қазақстанның өз позициясын жақсартуына ақшаны жылыстату және терроризмді қаржыландыруға қарсы шараларын жетілдіруі себеп болғанын хабарлайды.
