ҚМА Перизат Қайрат ақшаны қалай жымқырып, анасы оған қалай болысқанын баяндады
Қаржылық мониторинг агенттігі аса ірі көлемде алаяқтық жасады, қылмыстық жолмен алынған қаражатты заңдастырды деп күдікке ілініп, ісі сотқа жолданатын Перизат Қайрат пен оның анасының қылмыстық схемасы туралы ақпарат жариялады.
Агенттіктің мәліметінше, Перизат Қайрат 2021-2024 жылдар аралығында қайырымдылық көмек көрсету мақсатында халықтан ақша жинаған. Ол бұл қаражаттар мұқтаж балаларға, Палестина және су тасқынынан зардап шеккендерге көмек көрсету үшін жұмсалатынын айтқан.
Тергеу амалдарының нәтижесіне сай, жалпы ұрланған қаржы көлемі 3,5 млрд теңгені құраған.
ҚМА Перизат Қайрат «Biz Birgemiz Qazaqstan 2030» қорына түскен қаражатты өзінің жеке және анасы Г. Алашбаеваның есепшоттарына аударып отырғанын мәлім етті. Кейін оларды зергерлік бұйымдарға, киім-кешекке, жиһаз бен саяхаттарға, жөндеу қызметтеріне, автокөлік жалдау және басқа да шығындарға жұмсаған.
«2024 жылы 1 сәуір мен 15 қараша аралығында су тасқынынан зардап шеккендерге көмек көрсету мақсатында «Biz Birgemiz Qazaqstan 2030» ҚҚ-ның есепшотына 2,8 млрд теңге жиналып, П.Қайрат оларды жымқырғаны анықталды.
Қылмыстық табысты жымқыру мақсатында ол 16 серіктес жеке кәсіпкермен металдан жасалған киіз үйлер, қайықтар, етіктер және басқа да заттарды жеткізу жөнінде жалған келісімдер жасасқан. Алайда бұл келісімдер іс жүзінде орындалмаған» – дейді агенттіктің ресми өкілі Ернар Тайжан.
Тергеу дерегіне сай, осының нәтижесінде миллиард теңгеден астам қаражат қолма-қол ақшаға айналдырылып, жеке мақсаттарына жұмсалған. Осы соманың 72 млн теңгесі оның анасы Г. Алашбаеваның есепшотына «Солтүстік Қазақстан облысындағы зардап шеккен тұрғындарға тұрмыстық техника сатып алу» деген сылтаумен аударылып, кейін ол П. Қайрат арқылы қолма-қол ақшаға айналдырылды.
«Ақшаның бір бөлігі сомасы 6,9 млн теңге құраған «Rolex» сағатын сатып алуға жұмсалған. Палестинаға көмек көрсету үшін жиналған қаражаттың бір бөлігін 2024 жылдың қаңтарында П.Қайрат «Rebel flowers» ЖШС-ны сатып алуға жұмсаған. Оның құны 23 млн теңге болса да, ол келісімшартта күдік туғызбау үшін 2 млн теңгеге төмендетілген соманы көрсеткен», – дейді агенттік өкілі.
Гүл бизнесінен түскен табысы 69 млн теңгені құраған.
Тергеу деректеріне сай, ұрланған қаражатқа 4 автокөлік, 4 пәтер, 2 автотұрақ орнын, үй, жер телімі және ғимарат сатып алынған.
Сондай-ақ жалпы құны 158 млн теңге болатын зергерлік бұйымдар, аяқ киім және сөмкелер тәркіленген.
Жалпы құны 865 млн теңгені құрайтын қылмыстық жолмен алынған мүлікке тыйым салынған.
Перизат Қайраттың анасы Г. Алашбаеваға қатысты үй қамау түріндегі бұлтартпау шарасы қабылданған.
Ал 3 сәуір күні Перизат Қайраттың ісін тергеу аяқталғаны хабарланған.
