UFC-дегі жеңіліссіз қазақстандық файтер Шавкат Рахмоновтың (19-0) туған қарындасы, кәсіби аралас жекпе-жек шебері Сора Рахмонова алғаш рет ана атанды.
Қуанышты жаңалықты Сораның жұбайы, Алматы облыстық мәслихатының депутаты әрі джиу-джитсудан Қазақстан Республикасының спорт шебері Нұрсұлтан Орынбасаров әлеуметтік желідегі парақшасында жариялады.
«Қуанышты бөліссең көбейеді демекші, осы бір жаңалығыммен бөлісіп, сіздердің ақ тілектеріңізбен бақытымды еселегім келді! Маған «әке», жарыма «ана” деген ең құрметті атақ беріп, шаңырағымызда бір жұлдыз жанды, Қызымыз өмірге келді! Аллаға шүкір! Алтын жарым Сора Рахмоноваға үлкен рахмет! Қуанышымызды бөлісіп жатқан барлық жандарға мың алғыс!», – деп жазды Нұрсұлтан.
Жеке өмірі мен мансабы
Сора мен Нұрсұлтанның махаббат хикаясы 2023 жылдың қараша айында елге жария болған еді. Сол кезде Нұрсұлтан Орынбасаров ұсыныс жасап, желтоқсан айында жұп шаңырақ көтерген. Алайда Сораның ағасы, UFC жұлдызы Шавкат Рахмонов олардың үйлену тойына қатыса алмаған. Себебі сол уақытта маңызды жекпе-жекке дайындалып жатқан.
Сора Рахмонованың спорттағы жолы
Сора соңғы жекпе-жегін 2023 жылдың мамыр айында NAIZA промоушенінің турнирінде өткізіп, ресейлік Валерия Карыгинаны (4-6-1) техникалық нокаутпен жеңген. 2024 жылдың қыркүйегінде АҚШ-тың Невада штатындағы Лас-Вегас қаласында Contender Series (DWCS) турнирінде UFC келісімшарты үшін жекпе-жекке шығуы керек болған. Алайда жарақатына байланысты бұл кездесуге қатыса алмады.
Еске сала кетейік, бұған дейін Шавкат Рахмовтың сүйікті фильмдері мен кітаптары туралы жазған едік.
