Әйеліне жүйелі түрде қол жұмсап келген экс-дипломат Сәкен Мамаш қамауға алынды
Сыртқы істер министрлігінде қызмет атқарған дипломат Сәкен Мамаш бұрынғы әйелі Карина Мамашқа зорлық-зомбылық көрсеткені үшін қамауға алынды. Бұл туралы Астана қалалық полиция департаментінің баспасөз қызметі хабарлады.
Полиция бұрынғы елші кеңесшісі қызметін атқарып келген Сәкен Мамаштың сол кездегі әйелі Карина Мамашты жүйелі түрде ұрып-соққанына қатысты дәлелдер жинаған. Жинақталған дәлелдер бойынша, экс-дипломатты қамауға алу туралы шешім қабылданған.
«Полиция жедел-тергеу тобын құрды. Оқиғаның барлық мән-жайын анықтау үшін бірқатар қажетті сараптамалар жүргізілді. Айтарлықтай дәлелдемелік база жиналып, шоғырландырылды. Тергеу нәтижесінде күдікті Сәкен Мамашқа қатысты Тергеу соты қамауға алу түріндегі бұлтартпау шарасын таңдады», – делінген баспасөз хабарламасында.
Карина Мамаштың оқиғасы
2024 жылдың мамыр айында Карина Мамаш «Не молчи» қоғамдық қорының әлеуметтік парақшасында үндеу жариялап, Сыртқы істер министрлігінде дипломат болып қызмет ететін күйеуінен зорлық-зомбылық көргенін айтты.
Бұл жағдайдан кейін СІМ дипломаттың дереу елге қайтарылып, тергелетінін мәлімдеді. Ал 10 мамырда елге қайтарылған шенеуніктің үстінен қылмыстық іс қозғалғаны хабарланды.
