Әлеуметтік желіде танымал актер Серік Шәріпке қатысты даулы видео тарап жатыр. Бейнежазбада ол жартылай жалаңаш күйде лифтіге енді кіргелі тұрған қызды қолынан тартып, жұлқылап алып кетеді. Осыған қатысты полиция тексеру жүргізіп жатқанын мәлімдеді.
Видеоны қазақстандық Әлия Бутеева жариялады.
«Тіпті ең қорқынышты түсімде сүйікті ер адамы қол көтеретін жан тәрізді елестеткен емеспін. Бірақ бұл болды. Менің ойымша, асып кетуге болмайтын шекара бар», – деп жазды ол.
Ол инстаграмда қызарып қалған бетінің суреттерін де жариялаған.
Осыған дейін «Заmandas» подкастында Серік Шәріп кейбір жағдайда физикалық күш қолданғанын мойындаған еді.
«Өмірімде үш рет жаңсақ бастым», – деді ол. Сөзінше, бұрынғы қарым-қатынасында қызын жамбасынан ұрған.
Қазір осы іске байланысты тексеру жүріп жатыр.
«Объективтік жағдайлар, соның ішінде оқиғаның орны мен уақыты анықталып, Қазақстан Республикасының заңнамасына сәйкес шаралар қабылданатын болады», – деп хабарлады Алматы полиция департаментінен.
Актердің мансабы тоқтай ма?
Болған жайттан кейін әлеуметтік желідегі оқырмандар актерді қаралай бастады.
«Сізбен барлық брендтер келісім-шарттарды бұзады деп сенемін»,
«Тек камераға күлесің, ал оның артында әйелдерді ұрасың»,
«Шамаң қызға ғана жетіп тұр ма? Әлсіз неме», – деп жазады оқырмандар
Болған жағдайдан кейін Salem Entertainment компаниясы Шәріп Серікті қара тізімге кіргізіп, барлық келісім-шартты тоқтатуды шешкен.
«Қазіргі уақытта бұрын жарияланған «Шакал» жобасы мен «Qarga» телехикаясының үшінші маусымы тоқтатылды. Сонымен қатар, актер «Meow» телехикаясының екінші маусымында да басты рөлдердің бірін сомдауы тиіс болғанына қарамастан, қатыспайтын болды», – деп жазылған компанияның ресми мәлімдемесінде.
Сондай-ақ «Патруль» фильмінің командасы Серік Шәріптің қатысуымен болған барлық эпизодтарды алып тастамақшы екендігі хабарланды.
Kursiv.Media осы іс жайлы актерге хабарласты, бірақ ол әлі пікір білдірген жоқ.
Ішкі істер министрлігінің дерегінше, ұрып-соғу және денсаулыққа жеңіл зиян келтіру туралы баптар бойынша Астана мен Алматы тұрғындары жиі жауапқа тартылады. Статистикаға сүйенсек, ұрып-соғу бойынша 3388 іс қозғалып, оның ішінде 387 адам ғана жазаланған.
