Мұхамеджан Тазабек Иманғали Тасмағамбетовтен төрт жыл бойы қорқып жүргенін айтты
Мұхамеджан Тазабек Иманғали Тасмағамбетовтің көзіне түсуге төрт жыл бойы қорқып жүргенін айтты. Бұл туралы желіге жазды.
«Имекеңнен төрт жыл аяқ тартып, қорқып жүрдім. 2001 жылы мен Президент оркестрінде қызмет жасаймын. Тәуелсіздіктің 10 жылдығына орай Конгресс Холлда үлкен іс-шара өтетін болып, соған 5 елдің президенттері келетін болды. Президенттік оркестрдің орындаушы – ақыны ретінде мен сол кештің бетін ашуым керек. Мерекеден бір күн бұрын концерттің басты дайындығы өтіп жатыр», – деп жазды Мұхамеджан Тазабек.
«Сақалыңды ал!»
Ол кезде Иманғали Нұрғалиұлы премьер-министрдің орынбасары. Шенеунік дайындыққа келіп, жеке өзі қадағалаған.
Бір кезде Иманғали Тасмағамбетов Мұхамеджан Тазабектен сақалын алуды өтінеді. Бірақ еркі өзінде екенін де айтып қалады.
«Имекең: «Егер сақалымды алмаймын» – десең, жарайды, өзің біл! Бірақ онда өлеңіңді басқа адамдар жаттап, орындап шықсын!» – деп өте мейірімді дауыспен айтты. Сосын мен ойлана келе «Алып тастаймын» – дегенге рухани дайын болмадым ба, білмеймін, принципке бардым ба, әйтеуір: «Иманғали аға, мен шықпай-ақ қояйын, өлеңімді өзгелер айтса айтсыншы» – деп едім: «Жақсы, бопты» – деді ағамыз. Бірақ «іштей толқып ұрсар ма екен?!” деп күтіп ем, ары қарай үндемеді», – деп жазды айтыс ақыны.
«Тасмағамбетов аямайды»
Дайындық біткен соң, Ермек Серкебаев және басқа да үлкен кісілер Тасмағамбетовтің айтқанын істеу керек екенін, әстесе оңбайтынын айтып қорқытыпты.
«Ай, енді, Имекең сені аямайды, қырына түсіп қалдың. Бекер қылдың, бала, көне салуың керек еді», – деп біраз қорқытып тастады. Ішімнен: «Қатты ренжіп жатса, ортаға, мені жақсы көретін Фариза ` (Оңғарсынова – ред) апамды салармын, оған да көнбесе бір мәнісі болар» – деген оймен жүрдім. Біраз уақыт қатқыл үкім қай жақтан келер екен деп, қауіптеніп жүргенім өтірік емес. Себебі әжептеуір адамдар ескерту жасады», – дейді Тазабеков.
Содан бері Мұхамеджан Тазабек Иманғали Тасмағамбетовтің көзіне түсуге төрт жыл аяқ тартып келіпті. Ол 2005 жылы Сауд Арабиясында Тимур Құлыбаев пен Иманғали Тасмағамбетовті кіші қажылыққа барған сапарында күтіп алған.
«Қашан ел боламыз!»
«Сосын бір көңілденіп тұрған сәтінде, ағама еркелей күлдім де, ойымдағыны айтып салдым:
–Аға, сіз маған қатты ренжіп қалды, енді аямайды деп еді, ұмытып кеткенсіз бе!
«Ол кісі таңғалды. Есіне әрең түсірді. Сосын әлгі ағаларымыздың ескертуіне таңғалып: «Мұқаш, айтшы, айналайын, осы, қашан ел боламыз?! Осы, азаматтардың ортасына от жаққанды қашан қоямыз?! Ағалардың онысы несі, титтей балаға үрей салып?», – деп кейіпті Тасмағамбетов.
«Ерлер аман болсын!»
Мұхамеджан Тазабеков Иманғали Тасмағамбетовтің ақкөңіл екенін айтып, сырттынан сөйлеп жүргендерге осылай араша түсіп отыр.
«Саясатты Тоқаевқа тапсырып, дінді имамдардан үйреніп, батаны ата-анадан алып, махабатты отбасыңнан ғана іздеп, сүйікті ісіңмен айналысып, тұлғаңды дамытып, тыныш жүргеннен артығы жоқ. Ел аман болсын, елдің тарихын жасайтын ерлер аман болсын!» – деп қорытындылады айтыскер.
Мұхамеджан Тазабеков Иманғали Тасмағамбетовтен қорқып жүргені туралы жазба арқылы, саясаткерге қолдау білдіріп отыр.
Мұның алдында Тасмағамбетов «ел мүддесін ойлап отқа түскенім үшін ресейшіл, сатқын болғаным ба» деп ақталған еді.
