Шуда қайтыс болған жүкті әйелдің туыстары перзентхананы қиратқан
Шуда жүкті әйел көз жұмған аурухананың ұжымы бас дәрігерді қызметтен босатуға қарсы. Ал марқұмның отбасы дәрігерлерді салғырттығы үшін кінәлап, қайғылы оқиғаны жасыруға тырысты деп айыптайды, деп жазады Orda.kz басылым.
Бір ай бұрын Жамбыл облыстық көпбейінді ауруханасына жүктілігіне 32 апта болған 25 жастағы әйел түскен. Дәрігерлер оған преэклампсия (жүктіліктің асқынуы) және қан қысымының жоғарылауы диагнозын қойған.
Марқұмның отбасы әйел адам есінен танып, аурухана дәретханасында құлап, бірнеше күн комада жатып, қайтыс болғанын айтады. Олар дәрігерлер бұл жағдайды жасырып, алдауға тырысты деп отыр.
«Жеңгеміздің қайтыс болғанын естіген соң бірден мәйітханаға бардық. Бірақ ол жерден таба алмадық. Кейін ауруханаға келіп, іздедік. Дәрігер көрсетеміз дегенімен, көпке дейін нақты ештеңе айтпады. Кейбірі тіпті білмейміз деді. Астыңғы қабатқа түсіп едік, бір жабық бөлмені көрдік. Ағам ішке кіріп, жайманы ашқанда жеңгемізді өлі күйінде тапты. Беті ісіп кеткен, жағымсыз иіс шығып тұрды – бірнеше күн жатқаны білініп тұр», – дейді марқұмның күйеуінің інісі.
Мәйіт Тараз қаласына сот-медициналық сараптамаға жіберілген.
Оқиға қоғамдық резонанс тудырғанынан кейін Денсаулық сақтау министрлігі дереу әрекет етіп, тексеру аяқталғанға дейін бас дәрігер мен босану бөлімінің меңгерушісі қызметтерінен уақытша шеттетілген. Ал Жамбыл облыстық денсаулық сақтау басқармасының басшысына қатаң сөгіс жарияланған.
Алайда Шу ауруханасының ұжымы бұл шешіммен келіспейді. Дәрігерлер бас дәрігер Қуаныш Төлепбергеновті қолдап, бейнеүндеу жазды.
«Біз Қуаныш Бақытұлына қолдау білдіруді азаматтық парызымыз деп санаймыз. Біздің бас дәрігеріміз бұл қызметке келгеніне небәрі алты ай ғана болды. Ана өліміне кінәлілер сот шешімімен жауапқа тартылады. Біз де болған жағдайға өкініш білдіреміз, бірақ бас дәрігеріміз – өз ісінің кәсіби әрі білікті маманы деп есептейміз», – дейді дәрігерлер.
Сонымен қатар, медицина қызметкерлері экстремалды жағдайда жұмыс істеуге мәжбүр екендерін айтады. Олардың сөзінше, мекемеде денсаулыққа қауіп төндіру, күш көрсету, тіпті өртеу әрекеттері де болған.
«Ақпарат тек біржақты берілді. Біз ұзақ уақыт үнсіз болдық, бірақ бізде де науқастардың қауіпсіздігіне, өзіндік сот жасауға, өрт қоюға, күш қолдануға қатысты дәлелдер бар. Бүгінгі күнге дейін біздің басшыға тікелей шабуылдар жасалып жатыр. Біз өте қиын жағдайда жұмыс істеуге мәжбүрміз», – дейді олар.
Орда басылымы редакцияға келіп түскен видеоларда марқұмның туыстарының ауруханаға баса-көктеп кіріп, терезелерді сындырып, медицина қызметкерлеріне шабуыл жасағаны көрінетінін айтады. Қазір жүкті әйелдің өліміне қатысты тергеу жалғасып жатыр.
