Қазақстандық компаниялар Шәріп Серікпен келісімшарттарын бұзып жатыр. Salem Entertainment-тен кейін Top_carskz сервисі актермен байланысын тоқтатты.
«Шәріп Серікпен (Шако) серіктестік үзілді», – деп жазған компанияның парақшасында.
Ал актерден жапа шектім деген Әлия Бутееваның парақшасында оқырмандары қолдау білдіріп жатыр. Олардың арасында Айтбек Амангелді, Роза Әшірбаева, Қанат Бейсекеев, Сая Оразғалиева, Әсел Асқар тәрізді қоғамдағы белгілі тұлғалар бар.
Ал актердің бұрынғы әйелі, Say Mo лақап атымен танымал Мөлдір Есембек мұндай жағдай өзінің басынан өткенін де айтты. Әншінің сөзінше, «бес жыл бұрын көрген хоррордың кесірінен әлі күнге дейін терапия қабылдауға мәжбүр».
«Мен сол кезде қолымда доказательство болмағандықтан, ашық осы тақырыпты қозғауға қорыққан болатынмын, себебі оның анасы адвокат. Плюс мені бәәәрі кінәлап, одан бетер кейбір таныстарым менен беттерін бұрған) Есімде, ЖК Вавилонның алдында қол көтерген болатын, бірақ мен ЖК-ға хабарласып видеоны ала алмадым. Ал сол түні әрі қарай не болғанын айтып бастасам ұзақ және қорқынышқа толы әңгіме», – деп жазады ол (автордың мәтіні сол күйінді көшірілді – ред.).
Еске салсақ, Шәріп Серікпен жақын қарым-қатынаста болған Әлия Бутеева парақшасына видео жариялады. Онда актер лифтіге енді кіргелі тұрған Әлияны жартылай жалаңаш күйде қолынан тартып, жұлқылап алып кетеді. Ол «сүйікті ер адамның қол көтергенін» жазады.
Осыдан кейін Salem Entertainment компаниясы Шәріп Серікті қара тізімге кіргізіп, барлық келісімшартты тоқтатуды шешкен. Ол түскен сериалдар тоқтатылып, кейбірінен актер қатысқан сахналар алынып тасталмақ.
