Wildberries орталығы, Medeu қонақүйі. 2025 жылы елімізде салынатын ең ірі жобалар

Осы жылы Алматыда Wildberries орталығы мен «Almaty Museum of Arts» мұражайы, ал Қарағандыда «Гиперборея» жел электр станциясы салынбақшы. Бұл туралы Экономикалық өсуді қамтамасыз ету жөніндегі штаб отырысынан белгілі болды.

Астана: дамуға инвестиция

Астана инвестициялық жобалар саны мен халық өсімінің қарқыны бойынша өңірлер арасында бірінші орында. Қала экономикасындағы шағын және орта бизнестің үлесі 73%. Бұл республикалық деңгейден екі есе жоғары.

Осы жылы қалаға 300 млрд теңгеден астам инвестицияға кемінде 50 жоба іске асырылмақ. Оның ішінде Wildberries  логистикалық хабы және ОZON көлік-логистикалық орталығының екінші кезегі бар. Одан бөлек:

• Kazak Protein зауыты (170 млрд теңге) – бидайды тереңдете өңдеу;

• ТОКК Қазақстан (55 млрд теңге) – жеңіл металдан жасалған қаптама өндірісі;

• LASSELSBERGER (23,6 млрд теңге) – құрылыс қоспасы мен бояу өндірісі;

• Электровоз құрастыру зауыты (15 млрд теңге) – электровоздарға арналған сервистік орталық.

Тағы бір жоба – индустриялық парк. Оның құрылысы биыл басталып, аумағында 500 млрд теңгеден астам сомаға 50-ге жуық жобаны жүзеге асыру жоспарланған.

Қарағанды облысы: өнеркәсіптік агломерация

2024 жылы Қарағандыда жалпы құны 174,6 млрд теңге болатын 118 инвестициялық жоба іске асырылды, 2,9 мың жұмыс орны ашылды. Ал биыл:

• «Сарыарқа» АЭА мен «Саран» индустриялық аймағын электрмен жабдықтау
• «Қазақстан» болат өндіру зауытының құрылысын бастау
• «CargoHUB Karaganda» мультимодальды аэрохабын құру жоспарланған.

Ұлытау: өнеркәсіпті дамыту

Ұлытау облысы жан басына шаққандағы жалпы өңірлік өнім бойынша көшбасшылардың бірі (6,1 млн теңге). Облыста 2,2 мың жұмыс орнын құратын жалпы құны 933 млрд теңге 19 инвестициялық жоба жоспарланған. 2025 жылы 17 жобаны іске асыру басталады, оның ішінде:

• Батыс Қаражал кен орнын игеру;

• Жезқазған мыс балқыту зауытының күкірт қышқылы цехын салу;

• Байыту фабрикаларын жаңғырту;

• Мұнай базасы мен респираторлар зауытын салу.

Сәтбаев қаласында индустриялық аймақ құрылып, жалпы құны 28 млрд теңге болатын 4 жобаға дайындық басталып жатыр. Нәтижесінде 150 жұмыс орны ашылады. Жалпы облыстың тиімді экономикалық дамуы үшін көмір химиясы мен ауыл шаруашылығын дамытуды бастау мәселесі де талқыланып жатыр.

Алматы: автоөнеркәсіп және туризм

Алматыда 21,5 мың жұмыс орнын құратын жалпы құны 1,5 трлн теңге болатын 95 жеке инвестициялық жоба іске асырылып жатыр. ЖӨӨ өсу болжамы 6,4%-ды құрайды. 2025 жылдағы маңызды бірқатар нысандар:

• Haval, Chery, Changan автомобильдерін шығаратын мультибрендтік зауыт (жылына 182 млрд теңге, 90 мың авто);

• «Almaty Museum of Arts» мұражайы (44 млрд теңге);

• Wildberries логистикалық орталығы (43,2 млрд теңге);

• Medeu Park Hotel қонақ үй кешені (17 млрд теңге).

Алматыда индустриялық аймақты кеңейту жоспарланып, дамудың екінші кезеңі 194 га аумақты қамтиды. Бірақ қала әкімінің орынбасары Әлішер Әбдіқадыровтың сөзінше, жобалық құжаттаманың мемлекеттік сараптамамен ұзақ келісілуіне байланысты индустриялық аймақтың кеңеюі кешіктіріліп жатыр.

Биыл Атырау облысында да жаңа жоба басталады. Наурызда өңірде полиэтилен өндіретін «Силлено» зауытының алғашқы қазығы қағылды.

Өңірлік жобалар көбейген сайын Қазақстан үкіметі шетелдік ұйымдардан қаржы тартып жатыр. Мәселен.  Еуропа қайта құру және даму банкі елдегі бірқатар жобаларға 2 миллиард еуро көлемінде инвестиция салмақшы.