Байлар Трамп тарифінің бір күнінде 208 млрд доллардан айрылды

Бейсенбіде әлемнің ең бай 500 адамы АҚШ президенті Дональд Трамп салық тарифтерін жариялаған бір күннің ішінде 208 млрд доллардан айрылды.

Bloomberg бұл оқиғаны COVID-19 індетінен бергі уақыттағы ең ірі бір күндік құлдырау деп сипаттады.

Бәрінен бұрын АҚШ миллиардерлері көбірек зардап шекті. Көп ақша жоғалтқандар көшін Марк Цукерберг, Джефф Безос және Илон Маск бастап тұр.

Марк Цукерберг

Meta компаниясының негізін қалаушы бір тәулікте 17,9 млрд доллардан, яғни байлығының шамамен 9%-нан айрылды. Себебі әлеуметтік медиакомпания акциялары қатты құлдыраған.

Айта кетейік, Маск дәулеті Трамп билікке келген уақытта еселеп артқан. Алайда Meta акциялары ақпанның ортасынан бері шамамен 28%-ға түскен.

Джефф Безос

Бейсенбі күні Amazon акциялары 9%-ға түсті. Соның салдарынан технология гигантының негізін қалаушы 15,9 млрд доллардан айрылды. Bloomberg мәліметінше, компания акциялары ақпандағы өрлеуден бері 25%-ға құлдыраған.

Илон Маск

Tesla бас директоры биыл 110 млрд доллардан айрылды. Ал бейсенбі күні ғана Маск 11 млрд доллар жоғалтты. Себебі адамдар миллиардердің Ақ үйдегі рөлін бағаламады. Оның үстіне электромобильдерді жеткізу кешігіп жатқаны да компания акцияларының құнын түсірді. Бейсенбі күні Tesla акциялары 5,5%-ға арзандады.

Соған қарамастан Илон Маск әлемнің ең бай адамы атағынан әзірге айрыла қойған жоқ.