Сүйіктісіне қол көтерген актер Шәріп Серік бес тәулікке қамауға алынды

Танымал актер Шәріп Серік бес тәулікке қамауға алынды. Сот оны бұрынғы сүйіктісін ұрып-соққаны үшін кінәлі деп таныды. Бұл туралы зардап шегуші Әлия Бөтеева мәлім етті.

Сот бүгін, 4 сәуірде, Алматыда өтті. Өнер иесі ҚР Әкімшілік құқық бұзушылық туралы кодексінің 73-бабының 1-бөлігі (отбасылық-тұрмыстық қатынастар саласындағы құқық бұзушылықтар) бойынша айыпты деп танылды. Бөтееваның айтуынша, Шәріп Серік сотта кінәсін мойындаған.

 «Сот шешімі қаншалықты әділ немесе әділ еместігін баға бере алмаймын, оны бағалауға менің құқым жоқ. Бірақ мен бұған дейін де айтқанымдай, менің бастапқы мақсатым кек алу немесе жанжал шығару ойымда болмаған», — деп жазды Бөтеева.

Еске салайық, әлеуметтік желіде танымал актер Серік Шәріпке қатысты даулы видео тарады. Бейнежазбада ол жартылай жалаңаш күйде лифтіге енді кіргелі тұрған қызды қолынан тартып, жұлқылап алып кетеді.  Осыдан кейін полиция тексеру жүргізіп жатқанын мәлімдеді.

Актердің сүйіктісі, қазақстандық блогер Әлия Бөтеева  лифтіден күшпен алып шыққан сәтін түсірген фото мен видеоны жариялаған болатын. 

осы оқиғадан соң қазақстандық компаниялар Шәріп Серікпен келісімшарттарын бұзды. Ал актерден жапа шектім деген Әлия Бөтееваға Айтбек Амангелді, Роза Әшірбаева, Қанат Бейсекеев, Сая Оразғалиева, Әсел Асқар сынды белгілі тұлғалар қолдау білдірді.

Кейіннен Шәріп Серік Әлия Бөтееваға қол көтергені үшін кешірім сұраған видеосын жариялады.