Тіркелмеген мопед иелеріне айыппұл салына бастады
2025 жылғы 5 сәуірден бастап Қазақстанда мопед жүргізушілері толыққанды жол қозғалысына қатысушылар ретінде тіркелді. Енді олар көлік құралын арнайы ХҚКО-да тіркеп, мемлекеттік нөмір алуға, жүргізуші куәлігіне ие болуға және сақтандыру рәсімдеуге міндетті. Бұл талаптарды орындамағандарға айыппұл салынып, мопедтері тәркіленеді.
Алматы көшелерінде қазірдің өзінде жаңа нөмір таққан мопедтер көбейе бастады. Ішкі істер министрлігінің мәліметінше, бүгінде ел бойынша 23 мыңнан астам мопед ресми тіркеуден өткен.
Қандай құжаттар қажет?
Мопед иелері енді мына талаптарды орындауы тиіс:
- Мопедті арнайы халыққа қызмет көрсету орталығында тіркеу;
- А1, А немесе В санатындағы жүргізуші куәлігі болуы керек;
- Міндетті азаматтық жауапкершілік сақтандыруын рәсімдеу.
Жаңа ережелерді бұзғандарға қандай жаза қарастырылған?
Қазақстан Республикасы Әкімшілік құқықбұзушылықтар кодексіне сәйкес:
Тіркелмеген мопедпен жүру — 10 АЕК (шамамен 39 320 теңге);
Жалған нөмір тағу — 15 АЕК (58 980 теңге);
Жүргізуші куәлігінсіз басқару — 5-тен 20 АЕК-ке дейін (19 660 – 78 640 теңге).
Сонымен қатар, құқық бұзушылардың мопедтерін айыптұраққа алып кетеді, бұл қосымша шығындарға әкеледі.
Ішкі істер министрлігі әкімшілік полиция комитетінің төрағасы Қайсар Сұлтанбаевтың айтуынша, мопед жүргізушілері бұдан былай жол ережелерін бұзса, автокөлік жүргізушілерімен бірдей жауапкершілікке тартылады. Яғни, енді олар қызыл жарыққа өту, рұқсат етілмеген жерде бұрылу немесе ішімдік ішіп көлік жүргізу сынды құқықбұзушылықтар үшін жазаланады.
