Freedom Holding Corp компаниясының акционері, Freedom QJ League қамқоршылық кеңесінің төрағасы Тимур Турлов Қарағанды қаласында жаңа спорт академиясын салуды көздеп отыр. Компания бұл ақпаратты растап, жобаның толықтай жеке қаражат есебінен жүзеге асырылатынын мәлімдеді.
Жоба аясында жыл бойы жұмыс істейтін манеж, 5 мың орындық стадион, жылытылатын және жарықпен жабдықталған жаттығу алаңы, 80–100 балаға арналған интернат (ұлдар мен қыздарға арналады), фитнес-зал, медициналық және қалпына келтіру кабинеттері, сондай-ақ әдістемелік бөлмелер салынады. Жаңа стадион балалар, жасөспірімдер және жастар құрамалар үшін толыққанды қолданыста болады.
Freedom QJ League лигасы Тимур Турловтың қолдауымен цифрлық шешімдерді белсенді түрде енгізіп келеді. 2024 жылы іске қосылған FF Manager платформасы қазірдің өзінде 11 халықаралық марапатқа ие болды. Бұған қоса, биылғы маусымда ойындарды талдауға көмектесетін «ақылды» камералар мен бейнеаналитика жүйесі енгізіледі.
Сондай-ақ, биыл екі жаңа жоба – «Болашақ ойыншысы» және «Болашақ бапкері» іске қосылады. Бұл жобалар болашағынан үміт күттіретін футболшылар мен мамандарға өз әлеуетін ашуға мүмкіндік беруді мақсат етеді.
Айта кетейік, бұған дейін Freedom Holding Corp негізін қалаушысы әрі негізгі акционері Тимур Турлов 2025 жылғы Forbes рейтингінде әлемдегі ең бай адамдар тізімінде 605-орынға көтерілгенін жазған едік.
Freedom Holding Corp құрамына «Фридом Финанс» АҚ, Freedom Bank, Freedom Finance Insurance сақтандыру компаниясы, Freedom Life өмірді сақтандыру компаниясы кіреді. Сонымен қатар, холдинг экожүйесінде Freedom Mobile, Freedom Drive, Ticketon, Aviata және басқа да жобалар дамып келеді.
