Геолог күні қарсаңында Президент атынан сала мамандарына мемлекеттік наградалар табысталды
Геолог күні қарсаңында Қазақстан Республикасының Президенті Қасым-Жомарт Тоқаевтың атынан Премьер-министр Олжас Бектенов геология саласының үздік мамандарына мемлекеттік наградалар тапсырды. Биыл кәсіби мереке Жұмысшы мамандықтар жылы аясында атап өтіліп жатыр.
Премьер-министр өз сөзінде геология саласының ел экономикасындағы рөлін ерекше атап өтті.
«Биыл еліміздің тарихында алғаш рет геологтерге арналған мемлекеттік награда енгізілді. Бұл – Мемлекет басшысының сіздердің ел дамуына қосқан үлестеріңізге деген жоғары бағасы», – деді Олжас Бектенов.
Президент тапсырмасымен геология саласындағы ерекше еңбек иелеріне жаңадан бекітілген «Қазақстанның еңбек сіңірген геологі» құрметті атағы табысталды. Сонымен қатар «Құрмет», «Еңбек Даңқы» ордендері және «Ерен еңбегі үшін» медальдарымен марапатталған мамандардың есімдері жарияланды.
«Қазақстанның еңбек сіңірген геологі» атағына ие болғандар:
- Марат Бітімбаев – Қ.И.Сәтбаев атындағы Геология ғылымдары институтының бас ғылыми қызметкері, Алматы қаласы
- Серікбек Дәукей – ҚР ҰҒА академигі, Алматы қаласы
«Құрмет» орденімен марапатталғандар:
- Хайрлы Әбілхасымов, Әбілқасым Батыров, Әшірәлі Бижанов
- Николай Жуков, Рахат Кукеева, Талғат Мәтішев
- Бақытгүл Мүсиева, Александр Николаенко, Валерий Руснак
«Еңбек Даңқы» ІІІ дәрежелі орденімен:
- Андрей Светличный – «Professional Geo Solutions Kazakhstan» ЖШС бас геофизигі
«Ерен еңбегі үшін» медалімен марапатталғандар:
- Ақмарал Байсалова, Гүлшат Исмаилова, Наталья Комарова
- Ерғали Құрабаев, Назигүл Минаева, Саида Нығматова
Биыл геологиялық барлау жұмыстары 2 миллион шаршы шақырымнан астам аумақты қамтып, 38 жаңа перспективалы кен орны анықталған. Сонымен қатар 2025 жылы Қарағанды облысындағы Күйректікөл учаскесінде сирек жер металдарының ірі қоры – 800 мың тоннадан асатын кен орны ашылды.
Премьер-министрдің айтуынша, Мемлекет басшысы геологиялық қоғамдастыққа көмірсутек әлеуетін тереңдетіп зерттеу жөнінде нақты міндеттер жүктеген. Бұл бағытта елімізде 15 шөгінді бассейн анықталған, оның 80%-ы Каспий маңы бассейніне тиесілі.
Салаға білікті кадр даярлау да басты назарда. Жоғары оқу орындары өндіріс орындарымен тығыз байланыс орнатып, студенттер нақты геологиялық зерттеу нысандарында тәжірибе жинауда. Бұл шаралар түлектердің санын арттыруға айтарлықтай ықпал етті.
Президенттің тапсырмасына сәйкес, биылдан бастап геологиялық жұмыстарды қаржыландыру көлемі де ұлғайтылады.
