Еуропа, Азия және Таяу Шығыс елдеріне 19 жаңа әуе бағыты ашылады – Көлік министрлігі
Көлік министрілігі Еуропа, Азия және Таяу Шығыс елдеріне 19 жаңа әуе бағытын ашуды жоспарлап отыр. Бұл туралы президент Қасым-Жомарт Тоқаевтың қабылдауында болған Көлік министрі Марат Қарабаев айтқан.
Қарабаев Қасым-Жомарт Тоқаевқа министрліктің 2024 жылы атқарған жұмысының қорытындысы туралы есеп беріп, алдағы кезеңге арналған жоспарымен бөліскен.
Министрдің мәліметінше көліктің барлық түрі бойынша тасымал көлемі 6%-ға өскен. Транскаспий халықаралық көлік дәлізі арқылы өтетін жүк тасымалы 4,5 млн тоннаны құрап, өсім 62%-ға жеткен. Сондай-ақ министр 12 мың шақырым жол жөнделіп, Қарағанды – Алматы, Талдықорған – Өскемен, Ақтөбе – Қандыағаш және Атырау – Астрахань тас жолдарын жаңғырту толық аяқталғанын мәлімдеген.
Қарабаев авиция саласына да тоқталып өткен.
«Алматы, Қызылорда және Шымкент қалаларының әуежайларында 3 жаңа жолаушылар терминалы салынды. Отандық әуе компаниялары 14,7 млн жолаушы тасымалдады. Әуежайларда 29,7 млн адамға қызмет көрсетіліп, 14% артты. Биыл Еуропа, Азия және Таяу Шығыс елдеріне 19 жаңа әуе бағытын ашу жоспарланып отыр», – деген министр.
Ал теміржол секторында 21 млн жолаушы тасымалданып, көрсеткіштер 3,9%-ға артқан. Бұдан бөлек 125 теміржол бекетін жаңғыртылып, 5 ірі инфрақұрылымдық жоба жүзеге асқан.
Қарабаевтың есебін тыңдаған президент қазақстандықтардың жол жүруіне анағұрлым қолайлы жағдай жасап, туристік нысандарға қолжетімділікті қамтамасыз етуді тапсырған. Тоқаев көлік-логистика саласын өркендетудің, сондай-ақ көлік инфрақұрылымын жаңғырту жобаларын сапалы әрі уақтылы жүзеге асырудың маңыздылығына тоқталып өткен.
Кездесу соңында президент министрге мынадай маңызды шараларды жүзеге асыруды тапсырған:
- Орталық – Батыс автожолының құрылысын жеделдетуді;
- Батыс Еуропа – Батыс Қытай дәлізін кеңейтуді;
- Транскаспий халықаралық көлік дәлізін дамытуға ерекше назар аударуды;
- ішкі және халықаралық әуе рейстерінің санын көбейтуді;
- көлік секторына инвестиция тарту жұмысын күшейтуді тапсырды.
Айта кетсек, Көлік министрлігі Қазақстанның 6 қаласында авиахаб құруды жоспарлап отыр. Бұл жобаларды жүзеге асыру үшін үкімет 2,1 млрд долар көлемінде инвестиция тартпақшы.
