Қазақстанның қай өңірінде баспана бағасы қымбаттап жатыр

Қазақстанда тұрғын үйді жалға беру бір жыл ішінде 12 %-ға қымбаттады. Ұлттық статистика бюросының деректеріне сәйкес, 2025 жылғы наурызда өткен жылдың осы айымен салыстырғанда жаңа тұрғын үй бағасы 5,9%-ға, екінші нарықтағы баспана бағасы 6,7%-ға өскен.

Қай өңірде үй қымбаттап жатыр

Өңірлер бөлінісінде жаңа тұрғын үй бағасының ең жоғары өсімі Павлодар қаласында – 18%, Көкшетауда – 15%. Қолданыстағы, яғни екінші нарықтағы  баспаналар Атырау (15,8%), Павлодар (12,9%) және Ақтөбе (12,7%) қалаларында едәуір қымбаттаған.

Ал жалға беру нарығында Астана (25,4%), Талдықорған (23,8%) және Семей (22%) қалалары көш бастап тұр.

Бір айдың ішінде (2025 жылғы ақпан мен наурызды салыстырғанда) жаңа тұрғын үйді сату – 0,6%, ал пәтерлерді қайта сату 1,4% өскен. Ал абаттандырылған тұрғын үйді жалға беру төлемі 1% арзандады.

Айта кетейік, Алматыда да қайталама нарықтағы пәтерлер қымбаттады. Наурызда бағалар 3,7%-ға өскен.

Еліміздің қай қаласында пәтерлер көп сатылды

Биыл наурызда үйді сату-сатып алу бойынша 27 739 мәміле тіркелді, оның 5 897-сі жеке сектордағы үйлер болса, 21 842-сі пәтерлерге тиесілі.  Дегенмен ақпан айымен салыстырғанда сату-сатып алу мәмілелері 4,4%-ға азайған. 

Астана қаласы ең көп баспана сатылған өңірлер ішінде көшбасында тұр. Бас қалада  сату-сатып алу бойынша 5 652 мәміле жасалған. Одан кейінгі орында Алматы, мегаполисте 5 069   сату бойынша шарт жасалған. Сондай-ақ Қарағанды облысында да үй нарығындағы сауда қызып тұр. Кеншілер шаһарында 2 130 мәліме жасалған. Ең аз мәміле Ұлытау облысында – 357 (1,3%).

Қандай пәтерлер сұранысқа ие?

Жалпы мәміленің 78,2%-ы – көпқабатты үйлердегі пәтерлерге тиесілі. Ең көп сұранысқа ие баспана түрі – екі бөлмелі пәтерлер. Олардың үлесі 8 647 мәмілені құрайды.