2024 жылы Ұлттық банк жүйелерімен 1,5 квадриллион теңгеге төлем жүргізілді
2024 жылы Ұлттық Банктің төлем жүйелері арқылы жалпы сомасы 1 487,4 трлн теңгеге төлем жүргізілді. Бұл 2023 жылмен салыстырғанда 51,7%-ға көп.
ҰБ мәліметінше, операциялар көбіне сағат 16.00-17.00 аралығында өңделеді. Операция күндері ұлттық төлем жүйелері (Банкаралық ақша аударымдары жүйесі мен Банкаралық клиринг жүйесі) арқылы жүргізілетін операциялардың бір тәуліктегі орташа көлемі – 5,9 трлн теңге.
Былтыр ҰБ жүйелерінде бір төлемнің орташа сомасы 16,9 млн теңге болды. Бұл 2023 жылғы көрсеткіштен 27,4%-ға (3,6 млн теңгеге) жоғары.
2024 жылы төлем жүйелерінің жұмыс істеуге жарамдылық коэффициенті Ұлттық Банк белгілеген нысаналы көрсеткіштерден асып, 99,96% болды. Бұл ұлттық төлем жүйелерінің көпшілікке қолы жететінін, үздіксіз жұмыс істейтінін растайды.
Төлем жүйелері туралы мағлұмат
Қазақстан Ұлттық Банкі – Банкаралық ақша аударымдары жүйесі (БААЖ) мен Банкаралық клиринг жүйесінің (БКЖ) операторы. ҰБ осы төлем жүйелері арқылы ұлттық төлем жүйесінің үздіксіз жұмыс істеуін және Қазақстан аумағында қолма-қол ақшасыз есеп айырысуды жүзеге асыру үшін қажетті инфрақұрылымды қамтамасыз етеді.
