Чехия атом электр станцияларына қазақ ураны жеткізіледі

«Қазатомөнеркәсіп» ұлттық атом компаниясы» мен ČEZ a. s. компаниясы Чехияның атом электр станциялары үшін қазақтың табиғи уран концентратын жеткізу бойынша келісімшартқа қол қойды.

Мәлімет Қазатомпром сайтында жарияланды.

«Келісім компанияның әлемдік уран нарығындағы орнын нығайтады», – деп хабарлайды Қазатомөнеркәсіп.

Чех компаниясы қазақ уранын Темелин атом электр станциясы үшін сатып алады. Қазақстан АЭС-ке қажетті уранның үштен бір бөлігін жеті жыл бойы қамтамасыз етеді.

Екі компания арасындағы келісімшартқа қол қою рәсімі ČEZ a. s.-тің Прагадағы кеңсесінде өтті.

Қазатомөнеркәсіп әлемде табиғи уран өндіретін ең ірі кәсіпорын. Қазақстан 2024 жылы уран өндірісін 10% арттырды. 2023 жылы бұл көрсеткіш 21 112 тонна болса, 2024 жылы елімізде 23 270 тонна уран өндірілді. Алайда былтыр сатылған уран көлемі 8%-ға азайып, 16,6 мың тонна болды.

«Қазатомөнеркәсіп» ұлттық атом компаниясының 2024 жылғы таза пайдасы екі есе өсіп, 1,13 трлн теңгеге жетті.