«Өздері кінәлі»: Ресей полиция тарапынан моншада қорлық көрген қырғыздарға қатысты пікір білдірді

Жарияланды
General News бөлімінің тілшісі
Қырғызстан Мәскеуде қорлық көрген азаматтарына араша түсіп отыр./facebook
Қырғызстан Мәскеуде қорлық көрген азаматтарына араша түскен еді./facebook

Ресей полиция тарапынан моншада қорлық көрген қырғыздарға қатысты пікір білдірді. Ресей мұны «жоспарлы тексеріс» деп атады.

ТАСС агенттігінің хабарлауынша, тексерілген шетелдіктердің жартысына жуығы Ресей Федерациясында заңсыз жүрген.

Бір елге қарсы бағытталмаған

«Мәскеудің Тимирязев ауданындағы қоғамдық орындарда, соның ішінде «Бодрость» монша кешенінде жүргізілген жоспарлы тексеріс қандай да бір елдің азаматтарына қарсы бағытталмаған», – деп мәлімдеді Ресейдің Сыртқы істер министрлігі.

Ведомство мәліметінше, 10 сәуірде Ресей құқық қорғау органдары Мәскеу қаласындағы қауіпсіздік пен қоғамдық тәртіпті қамтамасыз ету мақсатында Тимирязев ауданында орналасқан қоғамдық орындарда («Бодрость» монша кешені және басқалар) жоспарлы тексеру жүргізіпті.

«Жартысы заңсыз жүр»

«Нәтижесінде шетелдіктердің шамамен жартысы елде заңсыз жүргені анықталды», – деп мәлімдеді министрлік.

Тексеру барысында ұсталып, құқық қорғау органдарына жеткізілген 59 шетелдіктің 25-і Ресейдің көші-қон заңнамасын бұзған.

«Олар заңға сәйкес жауапкершілікке тартылады, – деді ведомство. – Кейбіреулері радикалды топтарға қатысы болуы мүмкін деген күдікке ілінген. Ресей тарапы бұл шетелдіктердің еліміздің заңдарына немқұрайлы қарауын, қоғам мен мемлекетке қарсы әрекет етуге ұмтылуын өкінішпен атап өтеді».

«Сақшыларға қарсылық көрсеткен»

Ұсталғандар полиция тарапынан зәбір көргенін айтқан. Ресей Моншада қорлық көрген қырғыздарға, яғни «құқық қорғау органдарының шамадан тыс күш қолданғанына» қатысты пікір білдірді.

«Бар ақпаратқа сүйенсек, операция кезінде шетелдіктер құқық қорғау органдарына қарсылық көрсеткен. Сол себепті оларға тиісті шаралар қолданылған. Сонымен бірге, күштік құрылымдар өкілдері Ресей заңнамасына сәйкес өз өкілеттіктері аясында әрекет етті», – деді министрлік.

Қырғызстан наразылығы

Бұған дейін Қырғызстан Мәскеуде  моншада жуынып жүрген  қырғыздардың не себепті ұсталғаны туралы ақпарат беруді сұраған болатын. Қырғыз Республикасы СІМ-нің мәліметінше, бұл мәселе СІМ басшысының орынбасары Алмаз Имангазиев пен Ресейдің Қырғызстандағы Төтенше және Өкілетті елшісі Сергей Вакунов арасындағы кездесуде талқыланған. Ресей тарапы аталған мәселе бойынша ресми нота алған.

Қырғызстанның парламент депутаттары да моншада қорлық көрген қырғыздарға қатысты өз наразығын ашық білдірді.

Сондай-ақ оқыңыз